Perezida Kagame yarebye umukino ikipe y’u Rwanda yatsinzwe mu majonjora ya Afrobasket 2021 (Amafoto)

Yanditswe na Eric Tony Ukurikiyimfura
Kuya 29 Ugushyingo 2020 saa 11:08
Yasuwe :
0 0

Perezida wa Repubulika Paul Kagame yakurikiye umukino wa nyuma wo mu itsinda D ry’amajonjora ya Afrobasket 2021, u Rwanda rwatsinzwemo na Sudani y’Epfo amanota 67-55 kuri iki Cyumweru.

Iyi mikino yari imaze iminsi itanu ibera muri Kigali Arena kuva ku wa Gatatu, yari yahuje ibihugu 12 bigabanyije mu matsinda atatu: A, B na D mu gihe itsinda E riri gukinira mu Misiri naho itsinda C rikaba ryarakinnye muri Gashyantare.

Perezida Paul Kagame ari kumwe n’abarimo Minisitiri wa Siporo, Munyangaju Aurore Mimosa na Mugwiza Désiré uyobora FERWABA, yarebye umukino wa nyuma mu matsinda wakiniwe muri Kigali Arena kuri iki Cyumweru.

Ikipe y’u Rwanda yari yatsinzwe na Mali na Nigeria, yasoreje kuri Sudani y’Epfo mu itsinda D.

Sudani y’Epfo yari yatsinze Mali, ariko igatsindwa na Nigeria, yayoboye agace ka mbere ku manota 17-12 mu gihe aka kabiri kasojwe ifite 16-10 (33-22).

Ikipe y’u Rwanda yazamuye amanota mu gace ka gatatu, igatsinda ku manota 19-18 (51-41) mu gihe aka nyuma katsinzwe na Sudani y’Epfo ku manota 16-14 (67-55).

Shyaka Olivier w’ikipe y’u Rwanda ni we watsinze amanota menshi muri uyu mukino (17) mu gihe Makueri Puondak wa Sudani y’Epfo yatsinzemo amanota 13.

Mu mukino wabanje, Nigeria yasoje imikino yayo iyoboye itsinda D n’amanota atandatu nyuma yo gutsinda Mali amanota 91-68.

Mu itsinda A, Tunisia yatsinze umukino wayo wa gatatu yahuyemo na Centrafrique ku manota 80-63 mu gihe Repubulika Iharanira Demokarasi ya Congo yabaye iya kabiri imbere ya Centrafrique nyuma yo gutsinda Madagascar amanota 82-64.

Indi mikino y’amajonjora muri aya matsinda izaba muri Gashyantare 2021 mu gihe u Rwanda ruzakira irushanwa nyir’izina hagati ya tariki ya 24 Kanama n’iya 5 Nzeri 2021.

Perezida Kagame yakurikiye umukino w'amajonjora ya Afrobasket 2021 wahuje u Rwanda na Sudani y'Epfo muri Kigali Arena kuri iki Cyumweru
Perezida Kagame akurikira umukino, ari kumwe na Minisitiri Munyangaju Aurore Mimosa na Mugwiza Désiré uyobora FERWABA
Shyaka Olivier ni we watsinze amanota menshi muri uyu mukino
Adonis Jovon Filer agerageza gucika umukinnyi wa Sudani y'Epfo
Kami Kabange ashaka aho amenera hagati y'abakinnyi ba Sudani y'Epfo
Hagumintwari Steven ashyira umupira mu nkangara
Teny Bak Puot wa Sudani y'Epfo yima umupira Adonis
Anyiarbary Makoi asifurwa ko yakiniye nabi umukinnyi w'u Rwanda
Sudani y'Epfo yatsinze imikino ibiri mu gihe u Rwanda rwasoje imikino yose ruyitsinzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .