U Rwanda rwasabye kwakira ijonjora rya kabiri ryo gushaka itike ya BAL

Yanditswe na Eric Tony Ukurikiyimfura
Kuya 22 Ukwakira 2019 saa 09:20
Yasuwe :
0 0

Ishyirahamwe ry’Umukino wa Basketball mu Rwanda (FERWABA), ryasabye ko u Rwanda rwakwakira imikino y’ijonjora rya kabiri ryo gushaka itike y’irushanwa rya Basketball Africa League (BAL) rizaba mu kwezi gutaha kugeza mu Ukuboza 2019.

Muri Gashyantare ni bwo Ishyirahamwe ry’umukino wa Basketball muri Leta zunze ubumwe za Amerika ritegura ‘NBA’ ryatangaje ko rigiye gutangiza shampiyona ya ‘NBA’ muri Afurika izitwa ‘NBA Africa League’.

Basketball Africa League ni irushanwa rizahuza amakipe 12 meza ku mugabane wa Afurika, rigatangira muri Werurwe 2020.

Imikino y’ijonjora rya mbere yatangiye mu minsi ishize, aho Patriots BBC ihagarariye u Rwanda yabaye iya mbere mu itsinda D ryakiniye muri Tanzania, ibona itike yo gukomeza mu ijonjora rya kabiri.

Ishyirahamwe ry’Umukino wa Basketball mu Rwanda (FERWABA) ryamaze gusaba kwakira imikino y’iri jonjora rya kabiri izatangira mu mpera z’ukwezi gutaha nk’uko IGIHE yabyemerewe na Perezida waryo, Mugwiza Désiré.

Ati” Ni byo, twamaze kubisaba. Twagaraga impamvu twumva twakwakira iyi mikino, ubu dutegereje igisubizo. Ntabwo amatariki aramenyekana neza kuko hari aho batarasoza gukina ijonjora rya mbere ariko iri jonjora rindi riteganyijwe hagati ya tariki ya 26 Ugushyingo n’iya 1 Ukuboza.”

Kugeza ubu amakipe yamaze kumenyekana azakina ijonjora rya kabiri ni Patriots BBC yo mu Rwanda, City Oilers yo muri Uganda, yombi yari mu itsinda D riherereye mu gace k’Iburasirazuba.

Hari kandi FAP Basketball yo muri Cameroun na Manga Baskteball yo muri Gabon, zo mu itsinda C rihereye mu Burengerazuba.

Itsinda A na B mu Burengerazuba n’itsinda E na F aherereye mu Burasirazuba, yose ntabwo aratangira gukina ijonjora rya mbere.

U Rwanda ni rwo ruzakira BAL Final 4 (izahuza amakipe ane mu cyiciro gisoza) n’Umukino wa nyuma byombi bizakinirwa i Kigali mu mpera za 2020.

Kigali Arena ni inzu y'imikino igezweho, yakira imikino ya Basketball
Kigali Arena ifite ubushobozi bwo kwakira abantu ibihumbi 10 bicaye neza
Perezida wa FERWABA Mugwiza Désiré yemereye IGIHE ko u Rwanda rwasabye kwakira ijonjora rya kabiri rya BAL
Mu nama yabereye i Dakar muri Nyakanga, ikitabirwa n'abarimo Umuyobozi wa NBA, Adam Silver (ibumoso), Umunyamabanga Mukuru wa FIBA, Andreas Zagklis (hagati) n'Umuyobozi wa Basketball Africa League, Amadou Gallo Fall (iburyo), ni bwo hemejwe ko imikino isoza Basketball Africa League (BAL) izabera i Kigali mu mwaka utaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza