00:00:00 IGIHE NETWORK KN KINYARWANDA EN ENGLISH FR FRANCAIS

Uganda yambuwe kwakira imikino y’amajonjora ya BAL

Yanditswe na IGIHE
Kuya 14 Ukwakira 2022 saa 08:33
Yasuwe :

Ishyirahamwe ry’Umukino wa Basketball muri Afurika, FIBA, ryafashe icyemezo cyo kwimura imikino yo gushaka itike y’Irushanwa Nyafurika rihuza amakipe ahagaze neza muri Basketball (BAL) yagombaga kubera muri Uganda kubera icyorezo cya Ebola cyahabonetse.

Itangazo rya FIBA Africa ryashyizweho umukono na Julien Farran ushinzwe Amarushanwa muri iri shyirahamwe, ku wa 12 Ukwakira 2022.

Imikino y’amajonjora ya BAL yagombaga kubera muri MTN Arena muri Lugogo, ubu yashyizwe mu Mujyi wa Dar es Salaam muri Tanzania, aho izabera ku wa 25-30 Ukwakira 2022.

Uganda yambuwe kwakira iri rushanwa mu kwirinda ikwirakwira rya Ebola, icyorezo kimaze gufata indi ntera muri iki gihugu.

Ubwo Minisiteri y’Ubuzima muri Uganda yatangazaga ko habonetse Ebola, FIBA Africa, yatangaje ko igiye kuvugana na komite ishinzwe ubuzima kuri iki kibazo.

Mu itangazo ry’iri shyirahamwe, ryagize riti “Turashaka kubamenyesha ko kubera icyorezo cya Ebola muri Uganda, FIBA yahisemo kwimurira muri Tanzania imikino y’Itsinda C muri BAL ku bw’umutekano w’abazaryitabira.’’

Amakipe ari mu Itsinda C arimo Urunani BBC (u Burundi), Hawassa City BBC (Ethiopia), Army Basket Club (Tanzania), Matero Magic (Zambia) na City Oilers (Uganda).

Andi makipe azakina amajonjora ya BAL arimo ari mu Itsinda A azahurira mu Mujyi wa Niamey (Niger), ayo mu Itsinda B azakinira i Yaoundé (Cameroun) mu gihe Itsinda D rizakinira i Antananarivo (Madagascar).

Imikino yo gushaka itike yo gukina BAL izabera mu mijyi ine ya Afurika aho izatangira ku wa 11 Ukwakira, isozwe ku wa 30 Ukwakira 2022.

Imikino ya nyuma ya BAL 2023 izabera mu Mujyi wa Kigali. Ni ku nshuro ya gatatu u Rwanda ruzaba ruyakiriye. Zamalek yo mu Misiri ni yo yegukanye iri rushanwa bwa mbere mu 2021 mu gihe iriheruka ryatwawe na US Monastir yo muri Tunisia.

City Oilers BBC ni yo ihagarariye Uganda mu mikino ya BAL. Aha ni mu mukino wayihuzaga na Patriots BBC yo mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .