Umusaruro w’ubufatanye bwa Banki ya Kigali na FERWABA muri Baskteball y’ u Rwanda

Yanditswe na Eric Tony Ukurikiyimfura
Kuya 15 Mutarama 2020 saa 01:42
Yasuwe :
0 0

Hashize umwaka Ishyirahamwe Nyarwanda ry’umukino wa Basketball, FERWABA, ritangiye ubufatanye n’umuterankunga mukuru, Banki ya Kigali, aho impande zombi zemeranyijwe gukorana mu gihe cy’imyaka itatu.

Banki ya Kigali itera inkunga amarushanwa ane ya FERWABA arimo shampiyona guhera mu mwaka ushize w’imikino wa 2018/19. Mu masezerano yashyizweho umukono n’impande zombi mu mpera z’Ugushyingo 2018, BK yashoye miliyoni 300 Frw muri Basketball y’u Rwanda mu gihe cy’imyaka itatu.

Mu mwaka wa mbere, amafaranga yatanzwe n’uyu muterankunga yafashije mu gutegura amarushanwa y’abato batarengeje imyaka 17 muri Basketball y’abakina ari batatu mu bahungu n’abakobwa.

Habaye kandi irushanwa ribanziriza shampiyona ryegukanwe na REG BBC mu gihe uburyo Shampiyona ya “BK Basketball National League” yakinwemo bwari butandukanye n’ubwo mu myaka yabanje, aho hiyongereyeho irushanwa rihuza amakipe yabaye ane ya mbere muri shampiyona rizwi nka “Playoffs”, ari naryo ryasize Patriots BBC yegukanye igikombe.

Kuri ibi hiyongereyeho kandi umukino wahuje abakinnyi b’intoranywa muri Shampiyona ‘’BK All-Star Game’’ wabaye mu Ugushyingo 2019.

Mu kiganiro yagiranye na IGIHE, Perezida w’Ishyirahamwe ry’Umukino wa Basketball mu Rwanda; Mugwiza Désiré, yatangaje ko gukorana na BK byatumye urwego rwa shampiyona ruzamuka ndetse n’abakunzi b’uyu mukino bitabira ku bibuga ku rwego rushimishije.

Ati “Iyo urebye urwego Shampiyona yacu igezeho, uburyo Shampiyona yacu ikunzwe n’abafana, iri ku rwego rushimishije ariko turifuza ko byarushaho cyane.’’

“Kuva rero Bank ya Kigali yaza, hari byinshi bigaragara ku kibuga, hari byinshi bigaragaza ko harimo guhangana n’uburyo Banki ya Kigali yamamazamo imikino yacu nabyo biri mu bituma abakunzi ba Basketball baza bishimye, atari n’umukino wa Basketball uhari gusa ahubwo n’ibindi bikorwa bijyanye na wo.”

Kirungi Brian ni Perezida wa Patriots BBC yatwaye Shampiyona, yabwiye IGIHE ko nk’abayobozi b’amakipe bishimiye ubufatanye na Banki ya Kigali kuko hari icyo byabafashije.

Ati “Kuza kwa BK kongereyemo ingufu nyinshi cyane, amakipe atagira amikora yabonye ubufasha. Imikino yabaye mu buryo bwiza, abafana, abasifuzi n’abategura amarushanwa ubona bose bakoze neza. Navuga ko wenda bitaraba byiza cyane ku makipe atakaza menshi nk’ava kure, ariko byaradufashije cyane.’’

Ku ruhande rw’abatoza, Bahufite John watozaga Kaminuza y’u Rwanda mu mwaka ushize w’imikino ariko kuri ubu akaba ari muri IPRC- Kigali BBC, na we yemeza ko ubufatanye na Banki ya Kigali bwazamuye urwego rwa Basketball y’u Rwanda.

Ati “Mu mwaka ushize kuva BK ije hari ikiyongereyemo cyane cyane ku bijyanye n’ibibera ku kibuga, ubwitabire bw’abantu no guhangana kw’amakipe nubwo hari ebyiri ziri hejuru y’izindi, ariko amafaranga bashyizemo hari icyo yahinduye.’’

Ndayisaba Ndizeye Dieudonné ‘Gaston’ wa Patriots BBC, wabaye umukinnyi w’umwaka (MVP) mu bagabo, na we avuga ko kuza kwa Banki ya Kigali muri Baskteball y’u Rwanda byahinduye byinshi mu kibuga ndetse no ku bakinnyi.

Ati “Mbona kuba BK yaraje ikagira ubufatanye na FERWABA byaradufashije nka Basketball muri rusange. Mbere na mbere ni mu buryo bw’amikoro, bifasha amakipe kandi kuba BK yarashyizeho ibihembo ku bakinnyi byatumye hazamo guhangana, buri wese akeneye ko yahabwa ibihembo bya BK kandi mu gihe umukino wajemo guhangana nibwo Basketball iryohera n’abakunzi bayo.’’

Binyuze muri ubu bufatanye, buri kipe yitabira shampiyona na Playoffs, mu bagabo n’abagore, ihabwa agera kuri miliyoni 2 Frw abafasha mu ngendo n’ibindi bitandukanye.

Ikindi ni uko, amakipe abiri ya mbere mu bagabo n’abagore yatsindiye guhagararira igihugu mu mikino y’Akarere ka 5 “Zone V” ahabwa miliyoni 2 n’ibihumbi 500 Frw ndetse akamamaza uyu muterankunga ‘BK’.

Ku bakinnyi 10 bitwaye neza (5 mu bagore na 5 mu bagabo) buri mukinnyi ahabwa miliyoni imwe y’amafaranga y’u Rwanda ndetse bazajya basinya amasezerano yo kuba abambasaderi ba BK mu gihe cy’umwaka umwe.

Hahembwe kandi abakinnyi bahize abandi mu gutsinda amanota menshi muri Shampiyona, gutsinda amanota atatu, dunk, abakinnyi batanga icyizere, abasifuzi bazamuye urwego n’abatoza bitwaye neza kurusha abandi.

Ubwitabire bw’abakunzi ba Baskteball ku mukino wahuje Patriots BBC na REG BBC muri Playoffs muri Kigali Arena yakira abantu ibihumbi 10, bwagarutsweho n’abatari bake barimo na Perezida Kagame.

BK Basketball National League mu mwaka w’imikino wa 2019/20izatangira ku wa Gatanu, ahateganyijwe imikino ibiri mu gihe izakomeza ku wa Gatandatu no ku Cyumweru haba mu bagabo no mu bagore.

Basketball isigaye iri umwe mu mikino ikunzwe n'Abanyarwanda batari bake- Aha ni ku mukino wa Playoffs wahuje Patriors BBC na REG BBC mu mwaka ushize
Basketball isigaye yarazamuye ibyishimo bya benshi bakunda imikino
Patriots BBC niyo yegukanye igikombe giheruka muri uyu mukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .