Abafana ba Arsenal barakariye Aubameyang wagiye mu bwiherero hagati mu mukino batsinzwemo na Brighton

Yanditswe na Eric Tony Ukurikiyimfura
Kuya 6 Ukuboza 2019 saa 07:42
Yasuwe :
0 0

Abafana b’ikipe ya Arsenal bagaragarije uburakari rutahizamu wabo, Umunya-Gabon Pierre-Emerick Aubameyang, wagiye gukoresha ubwiherero hagati mu mukino ubwo Arsenal yakinaga na Brighton kuri uyu wa Kane.

Uyu rutahizamu Arsenal igenderaho, yavuye mu kibuga mu minota mike mu gihe ikipe ye yari ikiri gushaka igitego cyo kwishyura.

Muri uyu mukino w’umunsi wa 15 wa Premier League, Adam Webester yafunguye amazamu ku ruhande rwa Brighton ku munota wa 36 mbere y’uko Alexandre Lacazette yishyurira Arsenal kuri ubu iri gutozwa na Freddie Ljungberg.

Iminota 90 yarangiye uyu munya-Suède wahawe Arsenal atabonye intsinzi mu mikino ibiri, ni nyuma y’uko Neil Maupay atsindiye Brighton igitego cyayihesheje intsinzi ku munota wa 80, umukino urangira Arsenal yari mu rugo, itsinzwe ibitego 2-1.

Aganira n’itangazamakuru nyuma y’umukino, umutoza w’agateganyo wa Arsenal, Freddie Ljungberg, yemeje ko Aubameyang yari akeneye kujya mu bwiherero.

Ati “Mu by’ukuri ntabwo nzi impamvu ariko yasohotse agaruka nyuma y’iminota itatu. Birashoboka ko mwabimubaza ariko iyo wumva utamerewe neza uba utamerewe neza, ntacyo twabihinduraho”.

Kuva mu kibuga kwa Aubameyang byavugishije abafana b’ikipe ye, aho umwe yanditse ati’’ Aubameyang yari yagiye mu bwiherero?’’

Undi na we yanditse ku rubuga rwa Twitter ati’’ Aubameyang yagiye mu bwiherero hagati mu mukino twari turi gutsindirwamo?’’

Hari n’uwibajije niba ’’Aubameyang yaba yaragiye mu bwiherero’’, undi ati’’ Na Aubameyang yagaragaye avuye mu rwambariro. Yari afashe akaruhuko ko kujya mu bwiherero?’’

Gutakaza uyu mukino byatumye Arsenal yuzuza imikino icyenda nta ntsinzi n’imwe ndetse ni agahigo kabi igize mu myaka 42 kuva mu Werurwe 1977, aho yamaze imikino 10 idatsinda.

Kuri ubu, iyi kipe iheruka kwirukana Unai Emery, iri ku mwanya wa 10 n’amanota 19, irushwa amanota 24 na Liverpool ya mbere, ikarushwa amanota 10 na Chelsea ya kane.

Rutahizamu wa Arsenal, Pierre-Emerick Aubameyang yagiye gukoresha ubwiherero hagati mu mukino Arsenal yaraye ihuyemo na Brighton
Aubameyang yagarutse mu kibuga nyuma y'iminota mike ubwo ikipe ye yashakaga igitego cyo kwishyura
Umutoza w'agateganyo wa Arsenal, Freddie Ljungberg utarabona intsinzi mu mikino ibiri, yavuze ko na we atazi igihe Aubameyang yagendeye, ariko mu gihe yari abikeneye, yagombaga kugenda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza