Abakinnyi ba Juventus bazamara amezi ane badahembwa kubera Coronavirus

Yanditswe na Eric Tony Ukurikiyimfura
Kuya 29 Werurwe 2020 saa 09:41
Yasuwe :
0 0

Abakinnyi ba Juventus n’Umutoza Maurizio Sarri bemeye kumara amezi ane badahembwa kugira ngo iyi kipe icungure agera kuri miliyoni 90€ (asaga miliyari 94.2 Frw) muri ibi bihe by’icyorezo cya Coronavirus.

Imikino yose yo mu Butaliyani yahagaritswe kugeza byibuze tariki ya 3 Mata 2020 kubera icyo cyorezo cyibasiye Isi.

Juventus ni imwe mu makipe yagaragayemo Coronavirus, aho abakinnyi bayo barimo Paulo Dybala, Daniele Rugani na Blaise Matuidi bayirwaye.

Rutahizamu Cristiano Ronaldo na bagenzi be, bemeye ko bazatahembwa umushahara wabo wose muri Werurwe, Mata, Gicurasi na Kamena kugira ngo bafashe ikipe yabo kwirinda ihungabana ry’ubukungu ryaterwa na Coronavirus.

Ubwo Shampiyona yahagararaga mu ntangiriro z’uku kwezi, Juventus yari imbere n’amanota 63, irusha inota rimwe Lazio mu mikino 26 yari imaze gukinwa.

Mu gihe umupira w’amaguru wakongera gusubukurwa muri iki gihugu cyugarijwe na Coronavirus kurusha ibindi mu Burayi, Juventus izongera gusuzuma icyemezo cyafashwe n’abakinnyi.

Mu itangazo ubuyobozi bw’ikipe bwashyize ahagaragara, bwagize buti “Juventus irashimira abakinnyi n’umutoza ku bw’ubwitange bagize mu gihe kitoroshye kuri buri wese."

Andi makipe y’i Burayi, abakinnyi bayo bemeye kugabanyirizwa umushahara ni Bayern Munich na Borussia Dortmund yombi yo mu Budage.

Muri Bayern Munich abakinnyi bazakatwa 20% mu gihe muri Borussia Dortmund bazahabwa 50%.

Muri FC Barcelone, abakinnyi ntibavuga rumwe n’ubuyobozi kuri ibyo byo kugabanyirizwa umushahara.

Abakinnyi ba Juventus bemeye kumara amezi ane badahembwa kubera icyorezo cya Coranvirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .