Abakinnyi batanu ba FC Barcelone banduye Coronavirus bigirwa ibanga

Yanditswe na Eric Tony Ukurikiyimfura
Kuya 2 Kamena 2020 saa 09:06
Yasuwe :
0 0

Abakinnyi batanu ba FC Barcelone yo mu Cyiciro cya Mbere muri Espagne basanzwemo Coronavirus ariko ayo makuru agirwa ibanga nk’uko byemezwa n’itangazamakuru ryo muri icyo gihugu.

Radiyo RAC1 yo mur Catalonia, yabitangaje binyuze mu kiganiro cyayo “Tu Diras” mu gihe FC Barcelone n’andi makipe asigaye, yitegura gusubukura shampiyona tariki ya 11 Kamena 2020.

Abakinnyi batanu banduye Coronavirus ntibatangajwe muri icyo kiganiro ariko hemejwe ko nta bimenyetso bagaragazaga, aho byagaragaye bamaze gufatwa ibizimini by’amaraso.

Amakuru ya RAC1 yahurijweho kandi n’aya El Chiringuito de Jugones, avuga ko hari n’abandi babiri mu batoza ba FC Barcelone banduye Coronavirus.

Abakinnyi batanu bari barwaye, barakize ndetse ubu ngo byizerwa ko bamaze kugaruka mu myitozo n’abandi mu gihe ngo abayobozi b’ikipe bahangayikishijwe n’uko bashobora kwibasirwa n’imvune.

FC Barcelone ifite Igikombe cya Shampiyona ya Espagne giheruka, yirinze kugira icyo ivuga kuri ayo makuru mu gihe ikinyamakuru AS cyatangaje ko iyi kipe yari yizeye ko icyemezo cyo kubitangaza kizafatwa na La Liga.

Mu cyumweru gishize, Kapiteni wa FC Barcelone, Lionel Messi, yavuze ko nk’abakinnyi bari bamaze iminsi bafite impungenge z’uko buri kimwe kizaba kimeze bitewe n’ibyabaye mu bice bitandukanye by’Isi kubera Coronavirus.

FC Barcelone izasubukura shampiyona tariki ya 13 Kamena, ihura na Mallorca.

Espagne iri mu bihugu byugarijwe bikomeye na Coronavirus, aho handuye abantu bagera ku bihumbi 240, abasaga ibihumbi 27 bamaze kwicwa n’icyo cyorezo.

Ku wa Mbere, byatangajwe ko abandi bantu bahitanywe na COVID-19 babonetse, bikaba ari ubwa mbere byari bibaye kuva muri Werurwe.

Abakinnyi batanu ba FC Barcelone n'abatoza babiri, banduye Coronavirus bigirwa ibanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .