Amavubi yemereye Minisitiri Munyangaju ko ashobora kwegukana igikombe cya CHAN 2020

Yanditswe na Eric Tony Ukurikiyimfura
Kuya 12 Mutarama 2021 saa 06:51
Yasuwe :
0 0

Kapiteni w’Amavubi, Tuyisenge Jacques, yabwiye Minisitiri wa Siporo, Munyangaju Aurore Mimosa, ko we na bagenzi be bihaye intego yo gutwara irushanwa rya CHAN 2020 rizabera muri Cameroun guhera ku wa 16 Mutarama kugeza tariki ya 7 Gashyantare 2021.

Ku gicamunsi cyo kuri uyu wa Kabiri nibwo Minisitiri Munyangaju Aurore Mimosa ari kumwe n’Umunyamabanga Uhoraho muri Minisiteri ya Siporo, Shema Maboko Didier na Meya w’Akarere ka Bugesera, Mutabazi Richard, basuye Ikipe y’Igihugu yitegura CHAN 2020, aho iri mu mwiherero i Nyamata.

Mu butumwa yahaye abakinnyi, abatoza n’abandi bazajyana, Minisitiri Munyangaju yabasabye kuzirikana icyizere bafitiwe n’Abanyarwanda, bakazaharanira guhesha igihugu ishema.

Yagize ati “Mugiye mu butumwa bw’Abanyarwanda, ubutumwa bw’u Rwanda. Mugiye kwanda amahanga muzahura, mugiye muri abaranga b’u Rwanda, mugende mwimane u Rwanda, mukotane muduhe intsinzi, muheshe u Rwanda ishema.”

Yakomeje agira ati “Mumaze iminsi mwumva ibyo Abanyarwanda babatezeho, ‘intsinzi n’ishema ry’Igihugu”, bigaragaza ko bakibafitiye icyizere cyo kubigeraho, kandi mukaba mwatungurana mukabashimisha, mugatahukana itsinzi.”

Kapiteni w’Ikipe y’Igihugu, Tuyisenge Jacques, yijeje Minisitiri wa Siporo ko Amavubi ashobora kwitwara neza, akegukana iri rushanwa rizamara ibyumweru bitatu ribera muri Cameroun.

Ati "Ubwacu nk’abakinnyi hari intego twihaye, ni ugukina kugeza ku mukino wa nyuma ndetse n’Igikombe tukakizana.”

Umutoza Mashami Vincent yavuze ko babonye ibihagije ngo bitegure iyi mikino, asaba Abanyarwanda aho bari hose kuzashyigikira Ikipe y’Igihugu.

Muri CHAN igiye kuba ku nshuro ya gatandatu, u Rwanda ruri mu itsinda C hamwe na Uganda, Maroc na Togo.

Umukino warwo wa mbere uzaba ku wa 18 Mutarama, ruhura na Uganda kuri Stade de la Réunification y’i Douala mu gihe ku wa 22 Mutarama ruzakina na Maroc kuri icyo kibuga mbere yo guhura na Togo ku wa 26 Mutarama kuri Stade de Limbé/Buea.

Ikipe y’Igihugu yashyikirijwe ibendera, izahaguruka i Kigali mu gitondo cyo ku wa Gatatu mu gihe umukino wayo wa mbere izawukina ku wa 18 Mutarama 2021, ihura na Uganda.

Minisitiri wa Siporo, Munyangaju Aurore Mimosa, yasabye Amavubi kuzitwara neza muri CHAN agahesha u Rwanda ishema
Kapiteni w'Amavubi, Tuyisenge Jacques, yabwiye Minisitiri Munyangaju ko bihaye intego yo kugera ku mukino wa nyuma ndetse bagatwara igikombe
Mashami Vincent yasabye Abanyarwanda kuzashyigikira Amavubi mu irushanwa agiye kwitabira
Amavubi yashyikirijwe ibendera ry'Igihugu mbere yo guhagaruka i Kigali ku wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .