00:00:00 IGIHE NETWORK KN KINYARWANDA EN ENGLISH FR FRANCAIS

APR FC ishobora gukorera umwiherero muri Maroc

Yanditswe na Eric Tony Ukurikiyimfura
Kuya 24 Nyakanga 2021 saa 09:01
Yasuwe :
0 0

Ubuyobozi bwa APR FC bwatangaje ko ishobora gukorera umwiherero muri Maroc wo kwitegura imikino ya CAF Champions League ariko ko bizaterwa n’uko icyorezo cya COVID-19 kizaba gihagaze.

APR FC yatwaye Shampiyona ya 2020/21 ku nshuro ya kabiri yikurikiranya idatsinzwe, izahagararira u Rwanda muri CAF Champions League ya 2021/22.

Kuri ubu, iyi kipe y’Ingabo yatangaje ko itazitabira irushanwa rya CECAFA Kagame Cup rizabera muri Tanzania kubera ko itaratangira imyitozo ndetse hakaba hari ingamba zo kwirinda COVID-19 zirimo Guma mu Rugo zigomba kubahirizwa.

Hari amakuru avuga ko iyi kipe izatangira umwiherero tariki ya 15 Kanama, ikazawukorera muri Maroc, aho isanzwe ifitanye umubano n’ikipe yaho ya gisirikare ya FAR Rabat.

Visi Perezida wa APR FC, Brig Gen Firmin Bayingana, yabwiye Royal FM ko nta cyemezo barabifataho, ariko bishoboka ku buryo bizaterwa n’uko icyorezo cya COVID-19 kizaba gihagaze.

Ati “Ntabwo turabiganiraho, uretse ko hari ikipe ya gisirikare ya hariya dufitanye umubano mwiza. Ibyo bishobora kuba byabaho nk’uko na bo bashobora kuba baza hano tukabakira bitewe n’umubano uri hagati y’amakipe yombi.”

Yakomeje agira ati “Bizaturuka kuri iki cyorezo uko gicishije macye, ariko nta nama ntabikoreye, gusa nzi ko hari ikipe dufitanye umubano hariya ku buryo no mu bikorwa duteganya gukora na byo byajyamo.”

Ingengabihe ya CAF Champions League ya 2021/22 iheruka gushyirwa hanze n’Impuzamashyirahamwe y’Umupira w’Amaguru muri Afurika, CAF, igaragaza ko ijonjora rya mbere rizakinwa hagati ya tariki ya 12 n’iya 19 Nzeri 2021.

Mu mwaka ushize w’imikino, APR FC yasezerewe itarenze iryo jonjora ubwo yatsindwaga na Gor Mahia FC yo muri Kenya ibitego 4-3 mu mikino ibiri (2-1, 1-3).

APR FC ishobora gukorera umwiherero muri Maroc yitegura CAF Champions League
Visi Perezida wa APR FC, Brig Gen Firmin Bayingana, yavuze ko nta cyemezo barafata ku gukorera umwiherero muri Maroc

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .