APR FC yahakanye ibyo gutandukana n’umutoza Nabyl Bekraoui

Yanditswe na Eric Tony Ukurikiyimfura
Kuya 24 Werurwe 2020 saa 04:03
Yasuwe :
0 0

Ubuyobozi bwa APR FC bwanyomoje amakuru avugwa ko yamaze gutandukana n’umutoza wayo wungirije, Naby Bekraoui, butangaza ko nta shingiro afite kuko uyu mutoza akiri mu Rwanda ndetse akomeje inshingano afite mu ikipe y’ingabo.

Hashize iminsi havugwa ko umutoza mukuru wa APR FC, Adil Mohamed Erradi atumvikana n’umwungirije, Nabyl Bekraoui ndetse uyu mutoza mukuru yahisemo ko Bekaroui yagenda, akishakira undi umwungiriza.

Itangazo rigenewe abanyamakuru ryashyizwe hanze n’Umuvugizi wa APR FC, Kazungu Claver, kuri uyu wa Kabiri tariki ya 24 Werurwe 2020, rinyomoza iby’uko iyi kipe yamaze gutandukana na Bekraoui.

Rigira riti” Ubuyobozi bwa APR FC buranyomoza ibihuha byatangajwe na Radio imwe yavuze ko Umutoza wungurije wa APR FC, Nabyl Bekraoui, yamaze kwirukanwa ngo kandi akaba adahari mu Rwanda yaragiye iwabo.”

“Ibi ni ibintu bitari ibya kinyamwuga kuko ntabwo babanje kubaza ubuyobozi bwa APR FC. Abatoza batatu barimo Hassan Haj Taleb waje guhugura abatoza b’abanyezamu bose barahari mu Rwanda.”

Aganira na IGIHE, Umunyamabanga Mukuru wa APR FC, Lt. Col. Sekaramba Sylvestre yavuze ko Nabyl Bekraoui akiri umutoza wa APR FC kuko amasezerano ye azarangirana n’umwaka w’imikino.

Yakomeje avuga ko abavuga ko abatoza ba APR FC batumvikana, atazi aho babikura kuko umutoza mukuru ari we wizaniye umwungiriza.

Ati “Ntaho yagiye kandi aracyari umutoza wa APR. Afite amasezerano kandi yasinye umwaka. Ibyo [by’umwuka mubi hagati y’abatoza] sinzi aho babivana. Umutoza mukuru ni we wazanye umwungirije kandi babanye neza. Ni ko kuri.”

Mu gihe ibikorwa by’imikino bimaze iminsi bihagaritswe mu Rwanda kubera icyorezo cya Coronavirus, APR FC ni yo ya mbere muri Shampiyona n’amanota 57 mu mikino 23 imaze gukina mu gihe mu Gikombe cy’Amahoro 2020, izahura na Kiyovu Sports muri 1/8.

APR FC yahanye ko yatandukanye n'umutoza wungirije Nabyl Bekraoui
Ikipe y'ingabo yavuze ko kandi abatoza bayo; umukuru Mohamed Adil Erradi (iburyo) na Naby Bekraoui (ibumoso) nta kibazo bafitanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza