00:00:00 IGIHE NETWORK KN KINYARWANDA EN ENGLISH FR FRANCAIS

Arsenal yikuye mu irushanwa rya Florida Cup

Yanditswe na Eric Tony Ukurikiyimfura
Kuya 21 Nyakanga 2021 saa 10:13
Yasuwe :
0 0

Ikipe ya Arsenal yo mu Cyiciro cya Mbere mu Bwongereza, yatangaje ko itazitabira irushanwa rya Florida Cup rizabera muri Leta Zunze Ubumwe za Amerika kuko hari bamwe mu bayigize barwaye COVID-19.

Arsenal yagombaga kwerekeza muri Leta Zunze Ubumwe za Amerika ku wa Gatatu, aho yari gukina imikino ibiri muri Florida Cup izabera muri Orlando.

Iyi kipe y’umutoza Mikel Arteta, yari kuzahura na Inter Milan yo mu Butaliyani ku Cyumweru, igakina undi mukino n’ikipe imwe hagati ya Everton na Millonarios yo muri Colombia.

Gusa itangazo yashyize hanze ku wa Kabiri, rivuga ko itakitabiriye iri rushanwa kuko hari abayigize basanzwemo COVID-19.

Iti “Bitewe n’umubare muto w’ubwandu bwa COVID-19 mu bo twagombaga kujyana muri Amerika ejo, tubabajwe no kwikura muri Florida Cup.”

Yakomeje igira iti “Iki cyemezo gikomeye gishingiye ku kwita ku buzima bw’abakinnyi n’abandi bagize ikipe. Turazirikana uburyo dutengushe abafana bacu muri Amerika bari biteguye kutubona duhatana muri Florida Cup mu rwego rwo kwitegura umwaka mushya w’imikino.”

“Turisegura kandi ku bategura Florida Cup bakoze akazi gakomeye mu myiteguro ndetse n’abafatanyabikorwa bacu bateguye ibi bikorwa ngo twitabire irushanwa. Turabamenyesha ko abasanzwemo COVID-19 nta bimenyetso bagaragaza ndetse ubu bari mu kato mu rugo.”

Kutitabira iri rushanwa bivuze ko Arsenal igomba gushaka indi mikino ya gicuti ishobora gukina mbere y’uko umwaka mushya w’imikino wa 2021/22 utangira mu kwezi gutaha.

Arsenal imaze gukina imikino ibiri ya gicuti yahuyemo na Hibernian na Rangers zo muri Ecosse, izatangira Premier League ku wa 13 Kanama, yakirwa na Brentford ivuye mu Cyiciro cya Kabiri.

Arsenal yikuye mu irushanwa rya Florida Cup kubera ko hari bamwe mu bayigize basanzwemo COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .