CHAN ya 2020 yari kwitabirwa n’u Rwanda yasubitswe

Yanditswe na Eric Tony Ukurikiyimfura
Kuya 17 Werurwe 2020 saa 06:05
Yasuwe :
0 0

Impuzamashyirahamawe y’Umupira w’Amaguru muri Afurika, CAF, yemeje ko Igikombe cya Afurika gihuza abakinnyi bakina imbere mu bihugu byabo “CHAN 2020” cyagombaga kubera muri Cameroun mu kwezi gutaha, cyasubitswe mu rwego rwo kwirinda ikwirakwira ry’icyorezo cya Coronavirus.

CHAN ya 2020 yari igiye kuba ku nshuro ya gatandatu, yari iteganyijwe guhera tariki ya 4 kugeza ku ya 25 Mata muri Cameroun, aho yari guhuza ibihugu 16 birimo n’u Rwanda.

Itangazo ryashyizwe hanze na CAF kuri uyu wa Kabiri tariki ya 17 Werurwe 2020, rivuga ko iki gikombe cya Afurika cyasubitswe kubera icyorezo cya Coronavirus cyibasiye Isi, kikazashyirwa ku yandi matariki atatangajwe.

CAF yagaragaje ko nubwo Cameroun yafashe ingamba zihariye zo kurwanya iki cyorezo, ariko hagendewe ku nama z’Umuryango Mpuzamahanga wita ku Buzima (OMS) no kuba iki cyorezo gikomeje kwiyongera muri Afurika, CHAN 2020 igomba gusubikwa.

Indi mpamvu ni uko kugeza ubu gukora ingenda mu bihugu bimwe na bimwe bya Afurika bigoye ndetse mu bihugu bimwe abaturage basabwe kwishyira mu kato mu rwego rwo kwirinda ikwirakwira ry’ubwandu.

Kuri uyu wa Kabiri kandi, nibwo hari hateranye inama yahuje Komite ishinzwe gutegura CHAN 2020 muri Cameroun (COCAN) yemeje ko bigoye ko iri rushanwa ryaba bitewe n’uburyo icyorezo gikomeje gushegesha ibihugu byinshi.

Iyi nama idasanzwe ya CAF yafashe kandi umwanzuro wo gusubika inama y’Inteko Rusange ya 42 yagombaga kubera muri Cameroun tariki ya 24 Mata 2020.

CAF yavuze ko ubuyobozi bwayo buzatangaza amatariki mashya CHAN 2020 izaberaho mu minsi iri imbere.

Ibihugu bitandukanye birimo n’u Rwanda byari byamaze kugaragaza ko bitazakina iri rushanwa kubera icyorezo cya coronavirus.

Maroc ni yo ifite igikombe cya CHAN mu 2018

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .