00:00:00 IGIHE NETWORK KN KINYARWANDA EN ENGLISH FR FRANCAIS

Etoile de l’Est yirukanye abakinnyi bane barimo Mbaraga Jimmy

Yanditswe na IGIHE
Kuya 13 January 2022 saa 12:05
Yasuwe :

Ubuyobozi bwa Etoile de l’Est FC bwirukanye abakinnyi bane batinze gutangirana n’abandi imyitozo, buvuga ko bagaragaje imyitwarire mibi.

Icyemezo cyo kwirukana aba bakinnyi cyatangajwe kuri uyu wa 13 Mutarama 2022. Cyafashwe nyuma y’aho ikipe ibahamagaje bose ngo basubukure imyitozo nyuma y’itangazo rya Minisiteri ya Siporo ryemerera amakipe kongera gukina Shampiyona yari yahagaritswe kubera ingamba zo kwirinda COVID-19.

Amakuru IGIHE yabwiwe na bamwe mu bayobozi ba Etoile de l’Est FC ni uko hirukanywe abakinnyi bane bazira imyitwarire mibi irimo kwanga akazi.

Abo bakinnyi ni Mashingilwa Kibengo Jimmy uzwi nka Jimmy Mbaraga, Gahamanyi Boniface uzwi nka Didier, Harerimana Jean Claude uzwi nka Kamoso na Nzabamwita David uzwi nka Saibadi wari wageze muri iyi kipe avuye muri Bugesera FC.

Aba bose ngo bahurije ku kuba baranze gusubukura imyitozo hamwe na bagenzi babo. Aba kandi ngo barashinjwa kugumura bagenzi babo kuko batarahabwa umushahara w’ukwezi kwa 12 k’umwaka ushize.

IGIHE yamenye ko aba bakinnyi batarahabwa amabaruwa abasezerera ariko mu gihe kidatinze barayashyikirizwa nk’uko amakuru ava muri iyi kipe abivuga.

Etoile de l’Est FC yirukanye aba bakinnyi mu gihe ku wa Gatanu, tariki 14 Mutarama 2022, ifite urugendo rugana i Rusizi aho izakina na Espoir FC ku wa Gatandatu, tariki 15 Mutarama 2022 mu mukino w’umunsi wa 12 wa Shampiyona.

Iyi kipe yo mu Karere ka Ngoma mu Burasirazuba iri ku mwanya wa 14 n’amanota umunani mu mikino 11 iyi kipe imaze gukina. Uyu ni umwaka wayo wa mbere muri Shampiyona y’Icyiciro cya Mbere yagarutsemo nyuma y’imyaka 24 itakibarizwamo.

Etoile de l’Est yirukanye abakinnyi bane barimo Mbaraga Jimmy/ Ifoto yakuwe kuri Twitter y'ikipe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .