Kuva ku kwamamaza amakariso kugera ku butoza, Freddie Ljungberg wahawe gutoza Arsenal ni muntu ki?

Yanditswe na Eric Tony Ukurikiyimfura
Kuya 30 Ugushyingo 2019 saa 12:08
Yasuwe :
0 0

Umunya-Suède Freddie Ljungberg ni we wagizwe umutoza w’agateganyo wa Arsenal nyuma yo kwirukanwa kwa Unai Emery wari umutoza mukuru, mu gitondo cyo kuri uyu wa Gatanu.

Uyu mugabo w’imyaka 42 uri mu bahabwa amahirwe yo kwemezwa nk’umutoza mukuru, yakoresheje imyitozo ya mbere kuri uyu wa Gatanu.

Ljungberg afite ibyangombwa bimwemerera gutoza nyuma yo kwitabira amasomo ajyanye nabyo mu Ishyirahamwe ry’Umupira w’amaguru muri Pays de Galles, gahunda yitabiriwe n’abarimo Thierry Henry na Mikel Arteta.

Mbere yo kugana mu butoza, avuga ko yagishishije inama abarimo abo mu ikipe y’Igihugu ya Suède ndetse na Arsene Wenger wabaye umutoza we igihe kirere.

Nyuma yo guhagarika gukina mu 2014, avuga ko kugaruka mu mupira w’amaguru ngo ari urukundo awufutiye kuko iyo abishaka, yari guhitamo gukomeza kwerekana imideli, aho yamamazaga imyenda y’imbere ya Calvin Klein mu 2003.

Ljungberg azwiho gutega amatwi abakinnyi, kubaha umwanya uhagije wo gukora ibyo bashaka mu myitozo ndetse na we akabibafashamo.

Mu rwambariro akenshi afata abakinnyi nka batatu cyangwa bane, akaganira nabo byihariye, cyane abo yatoje mu ikipe y’abato barimo Bukayo Saka na Joe Willock.

Arsenal yamwifuje kuva akiri muto, ku myaka 16 gusa ubwo yakiniraga Halmstad. Mu buto bwe ngo yarangwaga no kuvuga make ndetse yasinziraga kenshi ubwo babaga bari mu rugendo. Ubwo yageraga muri Arsenal, yakinaga inyuma ya ba rutahizamu ariko umutoza Wenger ahitamo kumukinisha ku mpande.

Umwe mu bahoze bakora muri Arsenal hagati y’umwaka wa 2000 na 2001, avuga ko Ljungberg azi kubana na bagenzi be, aho yigeze guhamagara mugenzi we hagati mu gicuku, amubaza niba yaparika imodoka iruhande rw’iye, kandi ntabwo yari yanyoye.

Urugendo rw’ubutoza yarutangiriye muri Arsenal mu 2016, mu ikipe y’abato batarengeje imyaka 15 mu gihe mu 2017 yagizwe umwungiriza wa Andries Jonker muri VFL Wolfsburg kugira ngo akomeze agire ibyo yigira kuri uyu mutoza babanye muri Arsenal, azamure urwego rwe.

Muri Kanama 2018, yagizwe umutoza w’ikipe y’abatarengeje 23 ya Arsenal mu gihe muri Kamena uyu mwaka aribwo yagizwe umutoza mu ikipe ya mbere, yungiriza Unai Emery asimbuye Steve Bould, ndetse yigaga ururimi rukoreshwa n’Abanya-Espagne kugira ngo abashe kumvikana n’umutoza, Unai, na we utumvaga neza Icyongereza.

Nyuma yo kwemezwa nk’umutoza w’agateganyo, Ljungberg abinyujije ku mbuga nkoranyambaga, yagize ati’’ Igihe cyose nzamara muri Arsenal nzatanga buri kimwe kugira ngo ngarure ibyishimo ku maso y’abayikunda. Dufite ibyumweru bike birimo imikino myinshi imbere kandi ikipe ikeneye ko muyiba inyuma. Reka dutangire gukora.’’

Uyu munya-Suède azatoza umukino wa mbere uzaba kuri iki Cyumweru ubwo Arsenal izaba yakiriwe na Norwich City.

Freddie Ljungberg yabaye umukinnyi wa Arsenal hagati ya 1998 na 2007, aho yayikiniye imikino 214, agatsinda ibitego 46.

Yatwaranye nayo ibikombe bibiri bya Premier League (2001/02 na 2003/04), bitatu bya FA Cup (2001/02, 2002/03 na 2004/05) na kimwe cya Community Shield mu 1999.

Ni umwe mu bahabwa amahirwe yo kugirwa umutoza mukuru hamwe n’abarimo Mauricio Pochettino wirukanwe na Tottenham, Mikel Arteta wungirije muri Manchester City, Massimiliano Allegri wahoze muri Juventus na Eddie Howe utoza Bournemouth.

Ljungberg yakoresheje imyitozo kuri uyu wa Gatanu
Uyu mutoza arahabwa amahirwe yo kuba yatoza Arsenal FC burundu atari umutoza w'agateganyo
Freddie Ljungberg yamurikaga imideri ndetse yamamazaga imyenda y'imbere ya Calvin Klein mu 2003

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza