Gicumbi FC na Heroes FC zasabye ko icyemezo cyafashwe giteshwa agaciro, Shampiyona ikazakomereza aho yari igeze

Yanditswe na Eric Tony Ukurikiyimfura
Kuya 31 Gicurasi 2020 saa 10:02
Yasuwe :
0 0

Amakipe ya Gicumbi FC na Heroes FC yasabye ko Komisiyo y’Ubujurire muri FERWAFA itegeka Komite Nyobozi y’iri Shyirahamwe gutesha agaciro icyemezo yafashe cyo gusoza shampiyona, ikazongera gusubukurwa igihe gukina bizaba bishoboka.

Ku wa Gatanu tariki ya 22 Gicurasi nibwo FERWAFA yatangaje ko Komite Nyobozi yayo yanzuye ko bitewe n’ingaruka z’icyorezo cya Coronavirus, shampiyona y’icyiciro cya mbere mu Rwanda ishyizweho akadomo, APR FC ihawe igikombe mu gihe Heroes FC na Gicumbi FC zari mu myanya ibiri ya nyuma, zimanutse mu cyiciro cya kabiri ubwo haburaga imikino irindwi.

Iki cyemezo kivuga ko kandi shampiyona y’icyiciro cya kabiri, yahagaze muri Werurwe hamaze gukinwa imikino ibanza yo mu matsinda abiri, izasubukurwa igihe gukina bizaba bishoboka (bishobora kuba muri Nzeri) hakinwa imikino ya Playoffs izahuza amakipe ane ya mbere muri buri tsinda, hashakwa abiri azamuka mu cyiciro cya mbere.

Ku wa Gatandatu tariki ya 30 Gicurasi nibwo Heroes FC na Gicumbi FC zakiriwe na Komisiyo y’Ubujurire muri FERWAFA nyuma y’uko zigaragaje ko zitishimiye icyemezo cyafashwe mu cyumweru gishize.

Me Mulindahabi Kabahizi Jean Olivier, uhagarariye amakipe yombi, yagaragaje ko Shampiyona y’icyiciro cya mbere yahagaze igeze kuri 80% mu gihe iy’icya kabiri yahagaze igeze kuri 45% ndetse yibutsa ko “iyo imikino y’amatsinda irangiye, hakinwa imikino ya ½, ¼, hagakinirwa umwanya wa gatatu, ndetse n’umukino wa nyuma ugaragaza ikipe ya mbere n’iya kabiri.”

Yakomeje avuga ko kandi “Mu nama yahuje FERWAFA n’amakipe y’icyiciro cya mbere, mu nama zatanzwe n’abanyamuryango bagize icyo cyiciro ku irushanwa ryabo, 14/16 bifuje ko irushanwa ryahagarara, ikipe ya mbere igahabwa igikombe kandi ntihagire ikipe imanuka mu cyiciro cya kabiri. Abanyamuryango 2/16 bongeraho ko hanazamurwa amakipe abiri avuye mu cyiciro cya kabiri maze amakipe yose hamwe yo mu cyiciro cya mbere akaba 18. Mu bindi byiciro naho kandi, ibyifuzo ntabwo byagiye kure y’ikingiki.”

Me Mulindahabi yongeye gushimangira ko impamvu Heroes FC na Gicumbi FC “zafashe umwanzuro wo kujuririra iki cyemezo kuko kinyuranyije n’amabwiriza n’inama z’inzego zitandukanye, kikaba kigaragaramo akarengane kandi kikaba kinyuranyije n’ibyifuzo by’abanyamuryango ba Ferwafa ubwabo. “

Yavuze ko bitumvikana uburyo icyiciro cya mbere cyasojwe kitarangiye, Komite Nyobozi ya FERWAFA ikemeza ko icya kabiri cyo cyemerewe kuzakina guhera muri ¼ ubwo imikino izaba yemerewe gusubukurwa.

Ati “Mu byo Komite Nyobozi ya Ferwafa yakoze rero, dusanga yarahannye GICUMBI FC na HEROES FC kuko kuzimanura mu cyiciro cya kabiri ni igihano. Iki gihano kandi dusanga nta shingiro gifite kuko mu mikino itandatu yari isigaye gukinwa, yifitemo amanota 18, nta kigaragaza ko arizo zari kumanuka mu cyiciro cya kabiri, cyane ko amakipe byari bikurikiranye bitarushanwa.”

Yatanze ingero z’uko mu bindi bihugu byagiye bikorwa birimo u Bwongereza, u Budage n’u Butaliyani (bo bazakomereza aho bari bageze), mu Buholandi na Angola (basheshe shampiyona ntihatangwa igikombe, ntihagira ikipe imanuka cyangwa izamuka), muri Argentine (batanze igikombe, ntihagira ikipe imanuka), muri Burkina Faso bafashe icyemezo cyo kongera amakipe akaba 18 no muri Togo na Guinée ( batanze igikombe, ntihagira ikipe imanuka cyangwa izamurwa).

Mu izina ry’amakipe yombi, Me Mulindahabi Kabahizi Jean Olivier yasabye Komisiyo y’Ubujurire muri FERWAFA “ Gutegeka ko icyemezo cyafashwe na Komite Nyobozi ya Ferwafa kuwa 22/05/2020 ku bijyanye n’irushanwa ry’icyiciro cya mbere bihindutse. Bityo amakipe ya GICUMBI FC na HEROES FC akaba agomba kuguma mu cyiciro cya mbere.”

“Gutegeka ko hafatwa imyanzuro isa ku marushanwa yose ategurwa na Ferwafa, hashingiwe ko abanyamuryango bose bareshya; Gutegeka ko irushanwa ry’icyiciro cya mbere risubukurwa hakinwa imikino y’umunsi wa 24 ku makipe atarawukinnye, ndetse n’imikino yose yari isigaye igakinwa, nk’uko byasabwe na Minisiteri ya Siporo kandi ishingiye ku nama yari yagiranye n’amashyirahamwe yose y’imikino.”

Yasoje agira ati “Akanama k’Ubujurire kandi karamutse kabibonye ukundi, hakwitabwa ku rugero rwiza rwatanzwe n’abandi bahanga mu by’umupira w’amaguru ndetse no ku cyifuzo cy’abanyamuryago bagize icyiciro cya mbere, irushanwa rigahagarara, ntihagire ikipe n’imwe imanuka, hakazamurwa ebyiri mu cyiciro cya kabiri, amakipe y’icyiciro cya mbere akava kuri 16 akagera kuri 18.”

Heroes FC yari imaze umwaka umwe mu cyiciro cya mbere mu gihe Gicumbi FC yazamutse mu cyiciro cya mbere mu 2013.

Gicumbi FC yifuza ko amanota y'umunsi wa 24 wa shampiyona abarwa n'imikino yari isigaye igakinwa
Heroes FC yari imaze umwaka umwe mu cyiciro cya mbere ntayo ntikozwa ibyo gusubukira mu cyiciro cya kabiri imburagihe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .