Ifoto y’Umunsi: Minisitiri Munyangaju yatambagijwe i Remera, agace kahariwe siporo

Yanditswe na Eric Tony Ukurikiyimfura
Kuya 16 Ugushyingo 2019 saa 12:06
Yasuwe :
0 0

Mu muhango wabaye ku wa 15 Ugushyingo 2019 ubwo hakorwaga ihererekanyabubasha hagati y’iyahoze ari Minisiteri y’Umuco na Siporo (MINISPOC) na Minisiteri ebyiri zayikomotseho; iya Siporo (MINISPOR) n’iy’Urubyiruko n’Umuco, Minisitiri wa Siporo, Aurore Mimosa Munyangaju, yatemberejwe agace ka Remera kahariwe Siporo.

Iri hererekanyabubasha ryabaye hagati ya Senateri Nyirasafari Espérance wayoboraga MINISPOC ariko kuri ubu akaba ari Visi Perezida wa Sena ushinzwe iby’amategeko no kugenzura ibikorwa bya Guverinoma; Minisitiri wa Minispor, Munyangaju Aurore Mimosa n’uw’Urubyiruko n’Umuco, Mbabazi Rosemary, ryabereye muri Kigali Arena.

Ubwo uyu muhango wari uhumuje, hakanafatwa ifoto y’aba bayobozi n’abo bazakorana, Minisitiri wa Siporo, Munyangaju yatemberejwe agace ka Remera gaherutse kwemeza ko kahariwe Siporo.

Ari kumwe na Senateri Nyirasafari Espérance na Minisitiri Mbabazi Rosemary, basohotse muri Kigali Arena berekeza muri Stade Amahoro ari naho hari Minisiteri ya Siporo.

Minisitiri Munyangaju akihagera yasuhujwe n’abarinda Stade Amahoro maze na we mu kubereka urugwiro arabapepera n’ikiganza cy’iburyo amwenyura, abagaragariza iby’ishimo nk’uko na bo bari babigenje.

Muri uyu muhango w’ihererekanyabubasha, Minisitiri Munyangaju yabwiwe na Senateri Nyirasafari imishinga yari igikomeje igomba kwitabwaho, irimo gushyira imbaraga muri Siporo Rusange (Car Free Day) ikagera no mu midugudu, gutunganya agace kubatsemo Stade Amahoro na Kigali Arena, hakagirwa ahantu hahariwe siporo nk’uko bikubiye mu gishushanyo mbonera giherutse gukorwa.

Yabwiwe ko kandi hari umushinga wo kuvugurura Stade Amahoro, anasabwa ko amashyirahamwe yari asanzwe ayikoreramo yazafashwa kubona aho yimukira.

Ministeri ya Siporo yibukijwe ko u Rwanda ruherutse gusaba kwakira Shampiyona y’Isi y’Amagare ya 2025 ndetse Nyirasafari asaba Munyangaju n’abo bazakorana ko babishyiramo imbaraga rukaba igihugu cya mbere cyakiriye iri rushanwa muri Afurika.

Minisitiri wa Siporo, Aurore Mimosa Munyangaju, apepera abarinda Stade Amahoro bari bamusuhuje. Yari kumwe na Senateri Nyirasafari Espérance (hagati) na Minisitiri w'Urubyiruko n'Umuco, Mbabazi Rosemary

Ifoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza