Imikino ya nyuma ya UEFA Champions League na Europa League ishobora kwigizwa inyuma ukwezi

Yanditswe na Eric Tony Ukurikiyimfura
Kuya 17 Werurwe 2020 saa 07:57
Yasuwe :
0 0

Imikino ya nyuma y’amarushanwa abiri ahuza amakipe ku Mugabane w’u Burayi, UEFA Champions League na Europa League, ishobora gushyirwa mu mpera za Kamena uyu mwaka bitewe n’icyorezo cya Coronavirus.

Kuri uyu wa Kabiri tariki ya 17 Werurwe 2020, nibwo habaye inama yahuje abanyamuryango 55 ba UEFA, yabaye hifashishijwe ikoranahubanga ry’amashusho (video conference), iyobowe na Aleksander Čeferin uyobora iyi Mpuzamashyirahamwe y’Umupira w’Amaguru.

Uretse umwanzuro wo gusubika Igikombe cy’u Burayi “Euro 2020” cyimuriwe mu mpeshyi ya 2021, haganiriwe kandi ku matariki mashya y’amarushanwa ahuza amakipe, aheruka guhagarikwa mu cyumweru gishize kubera Coronavirus yibasiye Isi yose.

Nubwo nta mwanzuro wafashwe ku marushanwa yombi, ikinyamakuru Marca cyo muri Espagne cyatangaje ko irushanwa rya UEFA Champions League rihuza amakipe yabaye aya mbere iwayo, ryagombaga gusozwa tariki ya 30 Gicurasi, ryigijwe inyuma ibyumweru bine, rikazasozwa tariki ya 27 Kamena 2020 i Istanbul muri Turikiya.

Ibi byatewe n’uko za shampiyona z’ibihugu bitandukanye by’i Burayi, zahagaritswe kugeza tariki ya 4 Mata ndetse n’imwe mu mikino ya 1/8 yo kwishyura muri Champions League, yagombaga kuba muri iki cyumweru, tariki ya 17 n’iya 18 Werurwe, ikaba itarakinwe.

Umukino wa nyuma wa Europa League, wo uzakinwa tariki ya 24 Kamena mu Mujyi wa Gdansk muri Pologne, aho kuba tariki ya 27 Gicurasi 2020.

Amatariki imikino isigaye ya 1/8 n’ibindi byiciro bikurikira, izakinirwaho ntibiratangazwa.

Kimwe mu byaganiriweho mu nama yabaye mu gitondo cyo kuri uyu wa Kabiri harimo ko guhera muri ¼ haba umukino umwe, aho kuba ibiri mu gihe guhera muri ½ imikino yose yazakinirwa mu Mujyi umwe mu gihe cy’iminsi itanu.

RB Leipzig, Atalanta, Atlético Madrid na Paris Saint-Germain ni yo makipe yamaze kubona itike ya ¼ cya UEFA Champions League mu gihe hasigaye kuba imikino yo kwishyura ya 1/8 hagati ya Manchester City na Real Madrid, Juventus na Lyon, FC Barcelona na Napoli ndetse na Bayern Munich na Chelsea.

Muri Europa League, hakinwe imikino itandatu ibanza ya 1/8 mu gihe indi ibiri yasubitswe kubera Coronavirus.

Liverpool yegukanye UEFA Champions League ya 2019 itsinze Tottenham ku mukino wa nyuma
Chelsea iri gukina Champions League uyu mwaka, yatwaye Europa League ya 2019 itsinze Arsenal ku mukino wa nyuma wabereye i Baku muri Azerbaijan

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .