Imikorere n’umusaruro witezwe kuri Académie ya Paris Saint-Germain izubakwa i Huye

Yanditswe na Eric Tony Ukurikiyimfura
Kuya 19 Nzeri 2020 saa 07:17
Yasuwe :
0 0

Mu gihe hagiye gushira hafi amezi umunani hemejwe ko binyuze mu bufatanye u Rwanda rufitanye na Paris Saint-Germain, iyi kipe yo mu Bufaransa izubaka Ishuri ry’Umupira w’Amaguru mu Karere ka Huye, Minisiteri ya Siporo yatangaje ko iri shuri rizatangira mu Ukwakira.

Guhera mu Ukuboza 2019, Ikigo cy’Igihugu gishinzwe Ubukerarugendo, RDB, cyatangiye ubufatanye n’ikipe ya Paris St Germain yo mu Bufaransa, buzamara imyaka itatu bugamije kureshya abashoramari no gukomeza kuba icyerekezo kibereye ubukerarugendo.

PSG izagira uruhare mu kuzamura abakiri bato binyuze mu gushinga ishuri ry’umupira w’amaguru mu Rwanda, aho iyi kipe izajya itegura imyitozo y’abatoza n’abakiri bato mu kubafasha kugira ubunararibonye bw’iyi kipe ikomeye ku mugabane w’u Burayi, by’umwihariko yanditse amateka mu Bufaransa.

Muri Gashyantare uyu mwaka, intumwa za PSG zari mu Rwanda, aho zahuye na Minisitiri wa Siporo; Munyangaju Aurore Mimosa, baganira ku mushinga wo kubaka iri shuri ry’umupira w’amaguru rizashyirwa mu Karere ka Huye, mu Ntara y’Amajyepfo.

Académie ya PSG i Huye izatangira mu Ukwakira uyu mwaka

Mu kiganiro yagiranye n’itangazamakuru ku wa Gatanu, tariki ya 18 Nzeri 2020, Minisitiri Munyangaju Aurore Mimosa, yavuze ko iri shuri rizatangira mu Ukwakira nyuma y’uko igihe cyari cyarateganyijwe gisubitswe kubera icyorezo cya Coronavirus.

Ati “Académie ya PSG yagombaga gutangira muri Nzeri. Gusa kubera icyorezo cya COVID-19, ntabwo bashobora kuza inaha, ariko turakorana nabo kugira ngo tumenye neza igihe bazaza mu Rwanda buri kimwe bakagishyira ku murongo.”

“Icyo navuga ni uko bishoboka ko mu Ukwakira aribwo twavuga ko biteganyijwe ko bazatangira gukorera mu Rwanda mu gihe byose byagenda uko tubishaka.”

Hatangiye gushakishwa abatoza n’abazayobora iri shuri rya ruhago

Muri Kamena nibwo Ishyirahamwe ry’Umupira w’Amaguru mu Rwanda (FERWAFA) ryatanze itangazo ry’akazi mu gihe muri Nyakanga, ryatangaje abakandida bujuje ibisabwa, bazakora ibizamini mu myanya itandukanye.

Ikipe yashyizweho ku bufatanye na FERWAFA, Minisiteri ya Siporo na Paris Saint-Germain yatoranyije Jimmy Mulisa na Seninga Innocent nk’abakandida babiri bazavamo ushinzwe ibijyanye na Tekinike muri iyi Académie izubakwa i Huye.

Jimmy Mulisa watoje APR FC, akaba n’Umutoza wungirije mu Ikipe y’Igihugu ‘Amavubi’, nta kipe afite kugeza ubu ariko atoza abana bo mu ishuri rye ry’umupira w’amaguru.

Ahanganiye umwanya na Seninga Innocent uherutse kwemezwa nk’Umutoza Mukuru wa Musanze FC ndetse yatoje amakipe arimo Police FC, Bugesera FC, Isonga FC na Etincelles FC.

Indi myanya ihataniwe muri Académie ya PSG harimo uw’Umuyobozi uzaba uyishinzwe. Abakandida babiri bazakora ikizamini kuri uyu mwanya ni Bananeza Raymond ndetse na Ndanguza Théonas.

Abatoza barindwi basabye kuvamo uzahabwa akazi ko gutoza abana ni Dushimimana Djamillah, Rumanzi David, Mbabazi Alain, Ntakirutimana Bonaventure, Umunyana Séraphine, Nonde Mohamed na Nyinawumuntu Grace.

Iyi Académie ya PSG izajya ikora gute? Umusaruro yitezweho ni uwuhe?

Mu kiganiro cyihariye yagiranye na IGIHE, Perezida w’Ishyirahamwe ry’Umupira w’Amaguru mu Rwanda; Rtd Brig Gen Sekamana Jean Damascène, yavuze ko mu mikorere y’iyi Académie atari ibikorwaremezo bizubakwa gusa, ahubwo hazashingirwa ku bisanzwe mu Rwanda.

Ati “Académie yabo abantu ntibazumve ko ari ukuza kubaka ibiorwa remezo, oya, ni ishuri rishingiye ku byo dufite mu Rwanda. Ni igikorwa bazagiramo uruhare, ariko hakoreshwa ibiri hano kuko bashyizeho n’ingingo zivuga ko duhitamo abantu bazajyana iwabo bakabatoza bijyanye n’urwo rwego, hakabaho n’ucunga iyo Académie n’ushinzwe imiyoborere yayo.”

“Ni Académie ishingiye ku matwara yabo n’ibyo badufashamo, izabamo abana b’Abanyarwanda ubwo n’abo mu karere [k’Uburasirazuba] bashobora kuzamo.”

Umuyobozi wa FERWAFA yavuze ko bazagira uruhare mu ishyirwa mu bikorwa ry’uyu mushinga kuko arirwo rwego rushinzwe umupira w’amaguru mu Rwanda.

Ati “Twebwe tugomba kubigiramo uruhare mu rwego rwa tekinike nka federasiyo kuko nitwe dufite ubunararibonye n’ubushobozi bwa tekinike mu by’umupira w’amaguru. Tugomba gukorana nabo.”

Abajijwe inyungu umupira w’amaguru ushobora kungukira kuri iri shuri rya ruhago, Rtd Brig Gen Sekamana yavuze ko ari amahirwe FERWAFA izaba igize yo kureba uburyo mu bihugu byateye imbere bakora ku buryo hanakubakwa andi mashuri yigisha umupira mu bice bitandukanye by’igihugu.

Ati “Nayo baramutse bayishyizeho bakitoza nta marushanwa ajyana nabyo, ntacyo yazatumarira. Tugomba gukora ku buryo tugira amarushanwa n’iyo Académie igomba kujyamo, ikatubera nk’icyitegererezo. Bikaduha n’isomo ryo gutoza n’abandi hirya no hino dushingiye ku buryo barimo barabikora, ku bunararibonye bwabo, ku byo batwereka, natwe tukarema izindi académie zisa nayo.”

“Urumva bishingiye ku byo twebwe dufite, ikinini batuzaniramo ni tekinike, yego nayo bashyiremo amafaranga make, ariko ibyinshi ni ibishingiye mu gihugu. Tugomba gukoresha ayo mahirwe duhawe kugira ngo itubere icyitegererezo cy’ibyo tugomba gukora. Birahura na gahunda twihaye yo kuzamura impano mu bato. Nibiba ngombwa tuzashyiramo n’abacu, tubishyurire, bavomere ubumenyi hamwe.”

Muri Werurwe uyu mwaka, Youri Djorkaeff watwaranye n’ikipe y’u Bufaransa igikombe cy’Isi mu 1998- akaba ari umunyabigwi wa Paris Saint-Germain- yasuye u Rwanda mu gihe cy’iminsi ine, aho yahuye n’abana b’Abanyarwanda bigira umupira w’amaguru mu ikipe y’abato ya Dream Football Academy, akinana nabo kuri Stade Amahoro.

Minisitiri wa Siporo, Munyangaju Aurore Mimosa yatangaje ko Académie ya PSG izatangira mu Ukwakira
Perezida wa FERWAFA, Rtd Brig Gen Sekamana Jean Damascène avuga ko Académie ya PSG izababera icyitegererezo cy'uburyo bashinga andi mashuri ya ruhago mu bindi bice by'igihugu
Jimmy Mulisa (ibumoso) na Seninga Innocent (iburyo) bazavamo uzaba ashinzwe ibijyanye na Tekinike muri Académie ya PSG izubakwa i Huye
Umunyabigwi wa PSG; Youri Raffi Djorkaeff yifotozanya n'abana b'Abanyarwanda bakina umupira w'amaguru nyuma y'imyotozo bakoreye kuri Stade Amahoro mu ntangiriro za Werurwe 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .