Itandukaniro rya Sarpong na Bizimana Yannick mu mboni za Rutanga

Yanditswe na Eric Tony Ukurikiyimfura
Kuya 14 Ukuboza 2019 saa 11:51
Yasuwe :
0 0

Kapiteni wa Rayon Sports, Rutanga Eric, yavuze itandukaniro riri hagati ya ba rutahizamu babiri b’iyi kipe, Bizimana Yannick n’Umunya-Ghana Michael Sarpong, bombi bamaze gutsinda hamwe ibitego umunani muri 22 iyi kipe imaze kwinjiza muri Shampiyona.

Rutanga Eric avuga ko aba bakinnyi bombi bakina ibitandukanye, aho Bizimana Yannick aguma imbere y’izamu ategereje imipira ihacaracara mu gihe Michael Sarpong asubira inyuma gushaka imipira.

Ati ‘’Bizimana Yannick ni umukinnyi mwiza uri muri ba rutahizamu dufite hano muri Rayon Sports kuko nkeka ko ari muri ba nimero icyenda Rayon Sports ifite. Sarpong ni rutahizamu ariko bakina ibitandukanye.’’

‘’Yannick ubona akina nka Ulimwengu Jules, akaguma imbere y’izamu, ariko Sarpong agakina ashaka imipira. Urumva ko ari abantu batandukanye. ‘’

Bizimana Yannick akinira Rayon Sports kuva muri Nyakanga uyu mwaka, nyuma yo kuyigeramo avuye muri AS Muhanga.

Uyu mukinnyi ukiri muto, wigaragaje mu mwaka ushize w’imikino, aho yatsinze ibitego 14 muri Shampiyona, kuri ubu amaze gutsindira Rayon Sports ibitego bine ndetse ni we wahembwe nk’umukinnyi w’ukwezi gushize muri iyi kipe yambara ubururu n’umweru.

Michael Sarpong watsinze ibitego 16 mu mwaka ushize w’imikino, kuri ubu amaze gutsindira Rayon Sports ibitego bine muri Shampiyona y’uyu mwaka.

Uyu musore w’imyaka 23 ukomoka muri Ghana byitezwe ko azerekeza mu Bushinwa mu mpera z’uku kwezi, aho yifuzwa n’ikipe ya Changchun Yatai Fc yo mu cyiciro cya kabiri muri iki gihugu giherereye ku mugabane wa Aziya.

Rayon Sports iheruka gusinyisha Umunya-Côte d’Ivoire Drissa Dagnogo ushobora gusigara mu mwanya w’uyu Munya-Ghana.

Bizimana Yannick ashimirwa na Oumar Sidibe ku mukino wa Heroes FC yatsinzemo igitego
Rutanga asanga Michael Sarpong hari byinshi atandukaniyeho na Bizimana Yannick
Ulimwengu Jules watsinze ibitego 20 mu mwaka ushize wa Shampiyona, na we agiye kwerekeza mu Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza