KNC wamaganye imisifurire mibi, yasabye ba Perezida b’amakipe gushyushya Shampiyona

Yanditswe na Eric Tony Ukurikiyimfura
Kuya 30 Ukwakira 2019 saa 07:37
Yasuwe :
0 0

Umuyobozi akaba na nyir’ikipe ya Gasogi United, Kakoza Nkuriza Charles (KNC), asanga abafana baje ku kibuga batakagombye gutaha bababaye biturutse ku musifuzi utari mu bakina ndetse yasabye abandi bayobozi b’amakipe kwirekura bakavuga mu rwego rwo gushyushya Shampiyona no kwerekana ko ibyo bakora bibarimo.

KNC yabigarutseho mu gihe ikipe ye ikomeje gutegura umukino w’umunsi wa gatandatu wa Shampiyona izakiramo Kiyovu Sports kuri uyu wa Kane saa 18:00 kuri Stade ya Kigali i Nyamirambo.

Abajijwe n’abanyamakuru uko abona imikino amakipe byitwa ko ari mato ahuramo n’amakuru ugasanga aya y’ibigugu asifurirwa neza kurusha ayo bakina, KNC yavuze ko ibyo byakagombye gucika kuko niba ikipe ikomeye, nta bufasha yakabonye buvuye ku musifuzi.

Ati” Ni amakipe afashwa n’imisifurire. Dusubiye ku mukino wa Mukura, sinzi niba wari uhari ariko abari bahari bazabikubwira. Uyu munsi niba ikipe izi ko ikomeye, ntikwiriye kugira ubufasha ubwo ari bwo bwose. Ntekereza ko imisifurire yakabaye iza mu kibuga ije guca imanza ntabera.”

Abajijwe niba nta bwoba bw’ibihano ashobora guhabwa kubera amagambo yavuze agaruka ku misifurire kandi bitemewe, KNC yavuze ko kutabivuga ari ryo kosa yumva rikomeye.

Ati” Mvuze ko imisifurire itagenze neza. Ikosa rikomeye ni ukutabivuga. Ntekereza y’uko uramutse utabivuze waba uri n’umurimbuzi ahubwo. Hagire igikosoka, niba turi mu mupira w’amaguru, umuntu agataha ababaye bitewe n’impamvu z’umuntu utakinaga (..). Ntekereza ko umusifuzi wavuga ngo agiye kungendaho yaba atari umunyamwuga, ahubwo bakwiriye kumfasha bakamagana bene wabo.”

Umuyobozi wa Gasogi United yasabye kandi abandi bayobozi b’amakipe mu Rwanda, kwirekura bakavuga kugira ngo bashyushye Shampiyona, bagarure abakunzi b’umupira w’amaguru ku bibuga.

Ati” Ni Shampiyona iryoshye, ni Shampiyona yabayemo kwirekura. Ubundi kera abantu bari aho ngaho ngo Perezida w’ikipe ntabwo ajya avuga, ngo uraza ukambara amakota ukajya aho ngaho ugakonja, Oya! Niba Perezida atavuze se hazavuga nde? Niba Perezida ubwe atishimira umukino, ntiyizere mu ngabo ayoboye ubwo ari mu biki?

“Aba Perezida b’amakipe ntimundakarire ari ko ndabakanguye, ni ngombwa ko mwiyumvamo ibintu murimo. Niba wumva utabirimo, bireke wenda ujye gucuruza cyangwa ujye mu ifamu uragire inka, umupira ntabwo ni ibyishimo. Yego ushobora gutsindwa ariko ntibyakubuza kwishima mu gihe utaratsindwa. Mushabuke, n’ushaka kuza kureba umupira avuge ati numvise uriya mu Perezida bimurimo.”

KNC yatangaje aya magambo mu gihe aheruka kwihanangirizwa (tariki ya 26 Ukwakira) na Komisiyo y’imyitwarire muri FERWAFA ku magambo yatangaje ku basifuzi ku mukino wahuje ikipe ye na Sorwathe FC ubwo bari mu cyiciro cya kabiri muri Nyakanga uyu mwaka.

Gasogi United iri ku mwanya wa munani n’amanota atandatu izahura na Kiyovu Sports ya gatandatu n’amanota 10 kuri uyu wa Kane saa 18:00 kuri Stade ya Kigali.

KNC wasabye abayobozi b'amakipe gushyushya Shampiyona, asanga abafana batakagombye gutaha bababaye kubera umusifuzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza