Kuri iki Cyumweru nibwo hakinwe umunsi wa 38 ari na wo usoza umwaka w’imikino wa 2019/20 muri Premier League.

Umukino wari utegerejwe na benshi ni uwahuje Leicester City na Manchester United zatandukanywaga n’inota rimwe ndetse zihataniye gusoreza mu makipe ane ya mbere akina UEFA Champions League.

Leicester City yananiwe kwihagararaho ku kibuga cyayo, itsindwa na Manchester United ibitego 2-0 byatsinzwe na Bruno Fernandes kuri penaliti yabonetse ku munota wa 71 ndetse na Jesse Lingard ku munota wa nyuma w’inyongera.

Ikipe y’Umutoza Brendan Rodgers, yasoje umukino ari abakinnyi 10 mu kibuga nyuma y’ikarita itukura yahawe Jonny Evans ku ikosa yakoreye kuri Scott McTomminay ku munota wa 90.

Manchester United yinjiye mu makipe ane ya mbere muri iki cyumweru, yasoreje ku mwanya wa gatatu n’amanota 66.

Chelsea FC yabaye iya kane nyuma yo gutsinda Wolves ibitego 2-0 byatsinzwe na Mason Mount na Olivier Giroud mu minota ya nyuma y’igice cya mbere.

Undi mukino wari ufite kinini uvuze kuri uyu wa 26 Nyakanga 2020 ni uwo West Ham United yanganyijemo na Aston Villa igitego 1-1, bituma iyi kipe ibona amahirwe yo kuguma muri Premier League kuko yari ikeneye byibuze inota rimwe nyuma y’uko Bournemouth na Watford zirangayeho.

Amakipe azakina Champions League mu mwaka utaha w’imikino ni Liverpool FC, Manchester City F.C, Manchester United na Chelsea F.C.

Muri Europa League hazajya Leicester City, Tottenham n’ikipe izegukana Europa League hagati ya Arsenal na Chelsea, zombi zizakina umukino wa nyuma wa FA Cup tariki ya 1 Kanama.

Amakipe yamanutse mu Cyiciro cya Kabiri ni: AFC Bournemouth, Watford na Norwich City mu gihe kugeza ubu ebyiri zimaze kumenyekana zizayasimbura ari Leeds United na West Bromwich Albion.

Rutahizamu wa Leicester City, Jamie Vardy, ni we wasoje ayoboye abatsinze ibitego byinshi na 23 mu gihe Pierre-Emerick Aubameyang wa Arsenal na Danny Ings wa Southampton, bombi batsinze 22.

Uko amakipe yatsindanye ku munsi wa nyuma wa Premier League

• Arsenal 3-2 Watford
• Burnley 1-2 Brighton & Hove Albion
• Chelsea 2-0 Wolverhampton Wanderers
• Crystal Palace 1-1 Tottenham Hotspur
• Everton 1-3 AFC Bournemouth
• Leicester City 0-2 Manchester United
• Manchester City 5-0 Norwich City
• Newcastle United 1-3 Liverpool
• Southampton 3-1 Sheffield United
• West Ham United 1-1 Aston Villa

Abakinnyi ba Manchester United bishimira igitego mu mukino batsinzemo Leicester City kuri iki Cyumweru

Olivier Giroud yatsindiye Chelsea igitego cya kabiri, isoreza ku mwanya wa kane muri Premier League

Abakinnyi ba Aston Villa bishimira kuguma muri Premier League nyuma yo kunganya na West Ham United igitego 1-1

Bournemouth yasubiye mu Cyiciro cya Kabiri nubwo yatsinze

Kapiteni wa Watford, Troy Deeney, yacitse intege nyuma yo gutsindwa na Arsenal, ikipe ye ikamanuka mu Cyiciro cya Kabiri nyuma y'imyaka itanu ikina Premier League