Mashami yikomye umusifuzi nyuma yo gutsindwa na Mozambique

Yanditswe na Eric Tony Ukurikiyimfura
Kuya 15 Ugushyingo 2019 saa 10:58
Yasuwe :
0 0

Umutoza w’Ikipe y’u Rwanda ‘Amavubi’, Mashami Vincent, yavuze ko penaliti yahawe Mozambique ikavamo igitego cya mbere yatumye abakinnyi b’u Rwanda bacika intege, bibaviramo gutakaza uyu mukino w’umunsi wa mbere wo mu itsindsa F ryo gushaka itike ya CAN 2021.

Amavubi yaraye atsindiwe muri Mozambique ibitego 2-0 mu mukino wabereye kuri Estádio do Zimpeto mu Mujyi wa Maputo.

Mu kiganiro n’abanyamakuru cyabaye nyuma y’umukino, umutoza Mashami Vincent yikomye imisifurire, avuga ko umusifuzi yafashije Mozambique ku gitego cya mbere.

Ati ”Icyo navuga ku mukino ni uko twakinnye n’ikipe nziza. Nashimira Mambas, umutoza n’abakinnyi ku ntsinzi babonye. Ntabwo byatworoheye, twakinnye uko tudasanzwe dukina. Ntabwo wari umunsi wacu.”

“Igitego cya mbere ndacyagishidikanyaho kuko ni icyemezo cy’umusifuzi. Umusifuzi ashobora kwemeza aho umukino werekeza. Iyo ukinira hanze ugatsindwa penaliti nk’iriya, biha imbaraga ikipe iri mu rugo. Twari mu mukino ariko abakinnyi bahise bacika intege. Igitego cya kabiri cyatewe no guhagarara nabi kw’abakinnyi bacu.”

Mashami yavuze ko iby’uyu mukino byarangiye, kuri ubu amaso bayahanze uw’umunsi wa kabiri u Rwanda ruzakiramo Cameroun ku Cyumweru.

Ati ”Twabuze kuguma mu mukino n’icyizere, ariko byarangiye. Ibi reka tubyiyibagize kuko dufite imikino myinshi yindi tuzakina. Mu minsi ibiri iri imbere tuzakina na Cameroun. Tubabajwe no gutakaza none ariko turizera ko tuzatsinda ubutaha.”

Amavubi arahaguruka muri Mozambique saa 12:00, agere i Kigali mu ijoro ryo kuri uyu wa Gatanu aje kwitegura umukino w’umunsi wa kabiri azakiramo Cameroun ku wa 17 Ugushyingo 2019 kuri Stade ya Kigali saa 18:00.

Nyuma yo gutsinda Amavubi, Mozambique yahise iyobora itsinda F n’amanota atatu, ikurikiwe na Cap-Vert na Cameroun zinganya inota rimwe nyuma yo kunganya ubusa ku busa ku wa Gatatu mu gihe u Rwanda rufite ubusa ku mwanya wa nyuma.

Mashami Vincent yahawe ikarita y'umuhondo mu gice cya mbere ubwo yabwiraga abasifuzi ko bari kumwiba
Mozambique yahawe penaliti itavuzweho rumwe, aho umusifuzi Adissa Abdul wo muri Benin yemeje ko Rwatubyaye yakoze umupira mu rubuga rw'amahina
Umutoza w'Amavubi Mashami Vincent ashimira abakinnyi be barimo Omborenga ubwo umukino wari urangiye

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza