Mu mvura n’umwijima, Amavubi yatsinzwe na Mozambique mbere yo kwakira Cameroun (Amafoto)

Yanditswe na Eric Tony Ukurikiyimfura
Kuya 15 Ugushyingo 2019 saa 12:49
Yasuwe :
0 0

Ikipe y’Igihugu y’u Rwanda ’Amavubi’ yatangiye nabi mu mikino yo mu matsinda yo gushaka itike ya CAN 2021 izabera muri Cameroun, itsindwa na Mozambique ibitego 2-0 mu mukino wa mbere wo mu itsinda F wabereye kuri Zimpeto Stadium kuri uyu wa Kane.

Uyu mukino wabaye mu mvura nyinshi yaguye mu Mujyi wa Maputo kuva utangiye kugeza urangiye.

Mozambique yatangiye umukino iri hejuru, aho yarushaga cyane Amavubi guhera ku munota wa mbere, isatira cyane izamu ry’u Rwanda ariko ubwugarizi bw’Amavubi bubanza kubyitwaramo neza.

Byasabye gutegereza umunota wa 25, Mozambique ibona penaliti ubwo umusifuzi yemezaga ko Rwatubyaye Abdul yakoze umupira mu rubuga rw’amahina, iyi yinjijwe neza na Edson André Sitoe.

Nyuma y’iminota ibiri n’amasegonda make, Mozambique yahise ibona igitego cya kabiri cyatsinzwe na Stelio Ernesto warobye umunyezamu Kimenyi Yves ku mupira wahinduwe na Witiness Chimoio.

Nyuma yo kubona ko Amavubi arushwa cyane mu kibuga hagati, umutoza Mashami Vincent yakoze impinduka ya mbere, Muhire Kevin asimburwa na Niyonzima Olivier Sefu ku munota wa 42.

Amavubi yasoje igice cya mbere asatira, yagarutse mu gice cya kabiri n’ubundi ari ku rwego rwo hejuru ariko nta buryo bukomeye yabonye bugana mu izamu.

Kimenyi Yves yarokoye izamu ry’Amavubi ubugira kabiri, aho abakinnyi ba Mozambique barimo Genty Cipriano bahushije uburyo bwinshi butandukanye bwashoboraga guhesha Mozambique ibindi bitego muri uyu mukino.

Habura iminota 16 ngo umukino urangire, Mashami Vincent yakoze izindi mpinduka havamo Hakizimana Muhadjiri wasimbuwe na Sibomana Patrick ndetse uyu yahushije uburyo bwashoboraga guhesha Amavubi igitego mu minota ya nyuma, umupira yateye uca ku ruhande rw’izamu.

Habura iminota ibiri ngo umukino urangire, umuriro wabuze kuri Estadio do Zimpeto, hashira iminota itatu, ugaruka hakinwa iminota y’inyongera itagize icyo ihindura ku mukino.

Nyuma yo gutakaza uyu mukino, Amavubi aragera i Kigali mu ijoro ryo kuri uyu wa Gatanu aje kwitegura umukino w’umunsi wa kabiri azakiramo Cameroun ku Cyumweru kuri Stade ya Kigali saa 18:00.

Mozambique yahise iyobora itsinda F n’amanota atatu, ikurikiwe na Cap-Vert na Cameroun zinganya inota rimwe nyuma yo kunganya ubusa ku busa ku wa Gatatu mu gihe u Rwanda rufite ubusa ku mwanya wa nyuma.

Abakinnyi babanjemo ku mpande zombi:

Rwanda: Kimenyi Yves, Omborenga Fitina, Imanishimwe Emmanuel, Nirisarike Salomon, Rwatubyaye Abdul, Bizimana Djihad, Muhire Kevin, Niyonzima Haruna (c), Tuyisenge Jacques, Kagere Meddie na Hakizimana Muhadjiri.

Mozambique: Julio Pedro Frenque, Sidique Ismail Mussagi, Edson André Sitoe, Zainadine Junior, Manuel, Kambala, Reinildo Mandava, Genny Cipriano Catamo, Stelio Ernesto Telinho, Witiness Quembo, Canhembe Neymar, Elias Pelembe (c) na Clesio David Bauque.

Abakinnyi 11 b'Amavubi babanjemo
Abakinnyi ba Mozambique babanje mu kibuga
Uhereye ibumoso: Kimenyi, Nirisarike, Muhire Kevin na Muhadjiri baririmba Rwanda Nziza
Haruna Niyonzima na bagenzi be baririmba Rwanda Nziza mbere y'umukino
Abaganga b'Amavubi n'abatoza baririmba Rwanda Nziza mu mvura nyinshi yaguye mbere y'uko umukino utangira
Kapiteni wa Mozambique Elias Pelembe na Haruna Niyonzima bifotozanya n'abasifuzi b'Abanya-Benin bayobowe na Adissa Abdul
Hakizimana Muhadjiri na Stelio Ernesto wa Mozambique, bakurikiye umupira
Umutoza w’Ikipe y'Igihugu ya Mozambique Luís Gonçalves atanga amabwiriza ku bakinnyi be
Clesio David ahanganiye umupira na Imanishimwe Emmanuel mu kirere
Kagere Meddie asanganira umupira ubwo yari akurikiwe na Chavango Junior
Clesiro David ubwo yacengaga Nirisarike na Muhire Kevin
Mozambique yahawe penaliti itavuzweho rumwe mu gice cya mbere
Mashami agerageza kugumisha abakinnyi be mu mukino nyuma y'uko Mozambique ihawe penaliti
Edson Stoe atereka umupira ngo atere penaliti
Umupira waje Kimenyi Yves awureba
Umunyezamu w'Amavubi yawukozeho ariko uramunanira ujya mu izamu
Kimenyi yihanganishwa na Nirisarike na Bizimana Djihad
Muhire Kevin yitabwaho n'umuganga w'Amavubi, Rutamu Patrick
Muhire yasimbujwe mbere y'uko igice cya mbere kirangira
Imanishimwe Emmanuel ni umwe mu batorohewe muri uyu mukino. Imyenda ye yanduye hakiri kare
Stelio Eneste (16) yishimira igitego cya kabiri cya Mozambique
Abakinnyi b'Amavubi bagiye kuruhuka baganira ku gice cya mbere
Umukino wabereye kuri Zimpeto Stadium yakira abafana basaga ibihumbi 42
Umukino wari witabiriwe nubwo wabaye mu mvura nyinshi
Renildo Mandava akurara Omborenga Fitina bari bahanganiye umupira
Umupira watewe na Tuyisenge Jacques washyizwe muri koruneri na myugariro wa Mozambique
Hakizimana Muhadjiri yitegura gutera koruneri
Niyonzima Haruna ajya gusaba umupira muri koruneri
Amavubi yasatiriye mu gice cya kabiri
Meddie Kagere asatira umunyezamu Julio Pedro wa Mozambique
JPEG - 315.6 kb
No mu minota ya nyuma imvura yari ikigwa
Omborenga Fitina akinana na Tuyisenge Jacques
Umuriro wabuze habura iminota ibiri ngo umukino urangire
Umuriro wabuze habura iminota ibiri ngo umukino urangire
Abanya-Mozambique bishimiye intsinzi babonye imbere y'u Rwanda
Umutoza w'Amavubi Mashami Vincent ashimira abakinnyi be barimo Omborenga

Amafoto: Himbaza Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza