Mukura yayoboye Shampiyona nyuma yo gutsinda Gicumbi FC igitegereje inota rya mbere (Amafoto)

Yanditswe na Eric Tony Ukurikiyimfura
Kuya 21 Ukwakira 2019 saa 07:08
Yasuwe :
0 0

Mukura Victory Sports yayoboye Shampiyona y’icyiciro cya mbere mu Rwanda nyuma yo gutsinda Gicumbi FC ibitego 3-1 mu mukino w’umunsi wa kane wabereye kuri Stade Mumena kuri iki Cyumweru.

Gicumbi FC iheruka guhagarika umutoza wungirije, Banamwana Camarade ndetse abakinnyi bayo bakaba batarakoze imyitozo ku wa Kane kubera kudahembwa, yashakaga uko yabona amanota ya mbere muri uyu mwaka w’imikino.

Mukura Victory Sports yamaze gutandukana n’uwari umutoza mukuru, Mathurin Olivier Ovambe, yatangiye isatira, ihusha uburyo bwiza ku munota wa kabiri ubwo Iradukunda Bertrand yashakaga gutsindisha umutwe, umupira ujya hejuru y’izamu.

Ikipe y’I Huye yakomeje gusatira, ibona ubundi buryo burimo ishoti rikomeye ryatewe na Ntwari Evode rica ku ruhande mu gihe Uwamungu Moussa yashoboraga kwitsinda ubwo yakuragaho umupira wahinduwe na Ndizeye Innocent.

Byasabye gutegereza umunota wa 32, Mukura Victory Sports ifungura amazamu ku giitego cyatsinzwe n’Umunya-Ghana Muniru Abdul ku mupira wahinduwe na Ndizeye mu rubuga rw’amahina.

Gicumbi FC yihariye iminota 10 ya nyuma mu gice cya mbere, ibona uburyo butatu burimo umupira Dusange Bertn atabashije kugeraho ngo awushyire mu izamu n’ishoti rikomeye ryatewe na Ssekabembe Shahat ryanyuze ku ruhande.

Hashize iminota itandatu amakipe yombi avuye kuruhuka, Gicumbi FC yabonye igitego cyo kwishyura cyatsinzwe na Dusange Bertin kuri penaliti nyuma y’ikosa ryakorewe kuri Mfitumukiza Nzungu wakiniwe nabi na Rugirayabo Hassan.

Mukura Victory Sports yatsindiwe igitego cya kabiri na Muniru Abdul ku munota wa 62 mu gihe Ntwari Evode yashimangiye intsinzi y’iyi kipe ku munota wa 66, atsinda igitego cya gatatu.

Rugirayabo Hassan yahawe ikarita ya kabiri y’umuhondo habura iminoa 19 ngo umukino urangire, bituma Mukura isoza ifite abakinnyi 10 mu kibuga.

Gutsinda uyu mukino byatumye Mukura Victory Sports ifata umwanya wa mbere n’amanota umunani, aho ikurikiwe na APR FC, Rayon Sports na Police FC zifite amanota arindwi. Aya makipe yose azakina mu cyumweru gitaha.

Mu yindi mikino yabaye kuri iki Cyumweru, Sunrise FC yabonye intsinzi ya mbere inyagiye Espoir FC ibitego 4-1, yuzuza amanota ane.

Heroes FC na yo yabonye amanota ya mbere mu cyiciro cya mbere, itsinze AS Muhanga ibitego 2-1 mu gihe Musanze FC yanganyije na Kiyovu Sports igitego 1-1.

Umunsi wa Kane wa Shampiyona uzakomeza ku wa Kabiri, aho Marines FC izakira APR FC, Rayon Sports yakire Bugesera FC mu gihe Gasogi United izakira Police FC ku Mumena.

Etincelles FC izakira AS Kigali mu mukino usoza umunsi wa kane, uzakinwa ku wa Gatatu kuri Stade Umuganda.

Umunya-Espagne Tony Hernandez wari umutoza wungirije, ni we wasigaranye Mukura VS by'agateganyo
Abakinnyi 11 babanjemo ku ruhande rwa Mukura VS
Abakinnyi ba Gicumbi FC babanje mu kibuga
Mutijima Janvier akinira nabi Mfitumukiza Nzungu mu kibuga hagati
Umunya-Ghana Muniru Abdul utarakinaga ku bwa Ovambe, yahawe amahirwe, atsinda ibitego bibiri
Rwigema Yves ahanganiye umupira na Mutijima Janvier
Iradukunda Bertrand ashoreye umupira mu gihe yari akurikiwe na Mfitumukiza Nzungu
Ssekabembe Shahat wa Gicumbi ahanganiye umupira Duhayindavyi Gael wa Mukura
Nduwantare Jean Marie Vianney utoza Gicumbi FC yatsinzwe umukino wa mbere muri itatu atatu aheruka gusabwamo gutsinda ibiri
Abakinnyi ba Mukura Victory Sports bishimira igitego cya mbere cyatsinzwe na Muniru Abdul
Yahise aza guhobera umutoza Tony Hernandez wamugiriye icyizere
Bruno Alain wa Gicumbi FC ni umwe mu bakinnyi bigaragaje muri uyu mukino
Bruno ahaganiye umupira na Olih Jacques, myugariro wa Mukura VS
Gicumbi FC yishyuye igitego kuri penaliti
Umunyamabanga wa Bugesera FC, Karenzi Sam na Perezida wa Gasogi United, KNC, barebye uyu mukino
Dukuzumuremyi Antoine wahoze mu buyobozi bwa Gicumbi FC na Perezida wa Mukura, Nizeyimana Olivier, barebye umukino baganira
Muniru ashimira Ntwari Evode wamurekeye umupira wavuyemo igitego cya kabiri
Muniru Abdul yatsinze ibitego bibiri muri uyu mukino
Gicumbi FC ni yo kipe itarabona inota muri Shampiyona

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza