Police FC yatsinze Gicumbi FC, ikomeza gusatira APR FC na Rayon Sports (Amafoto)

Yanditswe na Eric Tony Ukurikiyimfura
Kuya 13 Ukwakira 2019 saa 06:20
Yasuwe :
0 0

Police FC yatsinze Gicumbi FC ibitego 3-2 mu mukino w’umunsi wa gatatu wa Shampiyona wabereye kuri Stade ya Kigali i Nyamirambo kuri iki Cyumweru, ikomeza gukubana n’amakipe ya APR FC na Rayon Sports ayoboye Shampiyona.

Police FC yatangiye iri hejuru, yafunguye amazamu ku gitego cyatsinzwe na Mico Justin ku munota wa 24 mbere y’uko Nsabimana Aimable atsinda icya kabiri ku wa 37.

Habura iminota ibiri ngo igice cya mbere kirangire, Gicumbi FC yakinanaga ishyaka ryinshi icungira ku mipira ya contre-attaque, yishyuyemo igitego kimwe, itsindiwe na Dusange Bertin.

Igice cya kabiri cyaranzwe no gusatirana ku makipe yombi, Gicumbi FC ibona uburyo bwashoboraga kuyihesha igitego ariko Munyakazi Youssuf Lule akinira nabi Ssekabembe Shahat inyuma gato y’urubuga rw’amahina. Iri kosa ryahanwe na Bati Abehanga Alain Benno, umupira uca ku ruhande rw’izamu.

Iyabivuze Osée yahinduye imipira ibiri ikomeye yashoboraga kugira icyo itanga ku ruhande rwa Police FC, uwa mbere Nshuti Dominique Savio ntiyawugeraho mu gihe undi watewe na Songa Isaie wasimbuye Ndayishimiye Antoine Dominique, ugaca hejuru y’izamu.

Ku makosa y’abakinnyi ba Police FC barimo Ngendahimana Eric wari umaze gusimbura Ntirushwa, Gicumbi FC yabonye igitego cyo kwishyura ku munota wa 65, gitsinzwe na Dusange Bertin wateye ishoti rikomeye umunyezamu Habarurema Gahungu arwana n’umupira ariko urenga umurongo.

Habura iminota umunani ngo umukino urangire, Iyabivuze Osée yacomekewe umupira na Mico Justin, asiga abakinnyi b’inyuma ba Gicumbi FC, atera umupira ukomeye wavuyemo igitego cya gatatu cya Police FC.

Gutsinda uyu mukino byatumye Police FC igira amanota arindwi ku mwanya wa gatatu, aho izigamye ibitego bibiri.

Iranganya amanota na APR FC na Rayon Sports. Ikipe y’ingabo izigamye ibitego bine mu gihe Gikundiro izigamye ibitego bitatu.

Gicumbi FC ikomeje gutegereza inota rya mbere muri uyu mwaka w’imikino nyuma yo gutsindwa imikino ibiri ibanza yahuyemo na Marines FC na AS Muhanga.

Mu yindi mikino yabaye, Mukura Victory Sports yari idafite umutoza mukuru Mathurin Olivier Ovambe wahagaritswe, yanyagiye Musanze FC ibitego 4-0 mu mukino wabereye i Huye.

Kiyovu Sports yatsinze Sunrise FC igitego 1-0 ku Mumena, cya Nizeyimana Jean Claude uzwi nka Rutsiro.

Umunsi wa kane wa Shampiyona uzakinwa hagati ya tariki ya 21 na 23 Ukwakira, nyuma y’imikino ibiri Amavubi azahuramo na Tanzania kuri uyu wa Mbere ndetse na Ethiopia ku wa Gatandatu.

Abakinnyi babanjemo ku mpande zombi:

Police FC: Habarurema Gahungu, Nsabimana Aimable (c), Mpozembizi Mohamed, Ndayishimiye Célestin, Nduwayo Valeur, Munyakazi Youssuf, Ntirushwa Aimé, Iyabivuze Osée, Ndayishimiye Antoine Dominique, Mico Justin, Nshuti Dominique Savio.

Gicumbi FC: Ndayisaba Olivier, Nzitonda Eric (c), Mutabazi Isaie, Bizimana Djuma, Rwigema Yves, Dusange Bertin, Ssekabembe Shahat, Mfitumukiza Nzungu, Muhumure Omar, Uwiringiyimana Christophe na Bati Abehanga Alain Benno.

Gahunda y’umunsi wa gatatu wa Shampiyona

Ku wa Gatanu tariki ya 11 Ukwakira

  • AS Kigali 2-2 Bugesera FC

Ku wa Gatandatu tariki ya 12 Ukwakira

  • APR FC 3-0 Etincelles FC
  • Espoir FC 1-2 Rayon Sports FC
  • Marines FC 1-1 Heroes FC
  • AS Muhanga 0-0 Gasogi United

Ku Cyumweru tariki ya 13 Ukwakira

  • Police FC 3-2 Gicumbi FC
  • Mukura VS 4-0 Musanze FC
  • SC Kiyovu 1-0 Sunrise FC
Abakinnyi ba Police FC babanje mu kibuga
Abakinnyi 11 ba Gicumbi FC babanje mu kibuga
Ba kapiteni bombi: Nzitonda Eric wa Gicumbi FC na Nsabimana Aimable wa Police FC, bifotozanya n'abasifuzi mbere y'umukino
Abasimbura ba Gicumbi FC
Abasimbura ba Police FC
Umutoza wa Police FC Haringingo Francis Christian (ibumoso), Rwaka Claude na Nkunzingoma Ramadhan
Abatoza ba Gicumbi FC bayobowe na Nduwantare Jean Marie Vianney (iburyo)
Ndayisaba Olivier ntiyashoboye gukuramo umupira watewe na Mico Justin ku gitego cya mbere
Dusange Bertin ahanganiye umupira na Nduwayo Valeur wa Police FC
Nzitonda Eric ashoreye umupira mu kibuga hagati, imbere ya Nshuti Dominique Savio
Mico Justin mu kirere, afunga umupira
Umunyezamu wa Police FC, Habarurema Gahungu akuramo umupira wari utewe na rutahizamu wa Gicumbi FC
Ntirushwa Aime yakinnye neza mbere y'uko asimburwa
Umukino wayobowe na Gakuru Steven
Mpozembizi Mohamed ahanganiye umupira na Ssekabembe Shahat wa Gicumbi FC
Iyabivuze Osee ahanganiye umupira na Muhumure Omar
Ndayisaba Olivier ubwo yari amaze gutsindwa igitego cya gatatu
Umunyezamu wa Gicumbi FC yananiwe kugarura umupira watewe na Nsabimana Aimable
Kapiteni wa Police FC, Nsabimana Aimable yishimira igitego cya mbere yatsindiye ikipe ye
Mfitumukiza Nzungu asatira Munyakazi Youssuf ngo amwambure umupira
Umutoza wa Police FC Haringingo Francis Christian atanga amabwiriza ku bakinnyi be
Umunyezamu wa Police FC, Habarurema Gahungu asohoka ngo akiza izamu
Umutoza wa AS Kigali Nshimiyimana Eric yasabye itangazamakuru na we yakurikiranye uyu mukino
Umutoza wa Gicumbi FC, Nduwantare Jean Marie Vianney yereka Gasongo Jean Pierre ibyo ajya guhindura mu kibuga
Umusifuzi wo ku ruhande, Itangishatse Ignace yerekana ko hagiye kubaho gusimbuza
Dusange Bertin (wambaye numero 8) yatsinze ibitego bibiri muri uyu mukino

Amafoto: Usanase Anitha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza