Rayon Sports yaraye ku mwanya wa mbere itsinze AS Kigali (Amafoto)

Yanditswe na Eric Tony Ukurikiyimfura
Kuya 8 Ukwakira 2019 saa 09:52
Yasuwe :
0 0

Mugisha Gilbert na Michael Sarpong bafashije Rayon Sports kurara ku mwanya wa mbere, ni nyuma y’uko itsinze AS Kigali ibitego 2-0 mu mukino w’umunsi wa kabiri wa Shampiyona wabereye ku matara ya Stade ya Kigali kuri uyu wa Kabiri.

Rayon Sports yihariye iminota myinshi y’umukino, yahushije uburyo bwinshi butandukanye burimo n’umupira watewe na Michael Sarpong, ukurwamo na na Ndayishimire Eric ‘Bakame’.

AS Kigali yakoze impinduka hakiri kare, Rusheshangoga Michel wavunitse, asimburwa na Rurangwa Mossi ku munota wa 31.

Rayon Sports yashoboraga gufungura amazamu ku mupira watewe na Sarpong adahagaritse, ugarurwa n’igiti cy’izamu. Hari nyuma y’uko Rutanga Eric yahanaga ikosa ryakorewe kuri Iranzi Jean Claude.

Mu minota ya mbere y’igice cya kabiri, Umunye-Ghana Michael Sarpong yateye umupira ukomeye wafashe umutambiko, umanukira mu izamu, ariko abasifuzi ntibagira icyo babivugaho nubwo abenshi bibwiraga ko warenze umurongo.

Mugisha Gilbert yahushije uburyo bwabazwe ku mupira yateye ku ruhande nyuma yo guherezwa na Oumar Sidibé.

Uyu mukinnyi wo ku ruhande ukina asatira, yiyunze n’abafana ba Rayon Sports, afungura amazamu ku munota wa 68 ubwo yaherezwaga na Michael Sarpong.

Sarpong yatsinze igitego cya kabiri habura iminota irindwi ngo umukino urangire, ni nyuma y’uko yari agushijwe mu rubuga rw’amahina na Rurangwa Mossi.

Fosso Raymond na Nkinzingabo Fiston bananiwe kubyaza umusaruro uburyo babonye mu minota y’inyongera, imipira bateye ijya ku ruhande.

Gutsinda uyu mukino byatumye Rayon Sports irara iyoboye Shampiyona n’amanota ane izigamye ibitego bibiri mu gihe APR FC izigamye igitego kimwe.

Rayon Sports izagaruka mu kibuga ku wa Gatandatu, yakirwa na Espoir FC mu gihe AS Kigali izakira Bugesera FC ku wa Gatanu.

Gahunda y’umunsi wa kabiri wa Shampiyona

Ku wa Kabiri tariki ya 8 Ukwakira

  • Rayon Sports FC 2-0 AS Kigali
  • Bugesera FC 0-1 APR FC

Ku wa Gatatu tariki ya 9 Ukwakira

  • Gasogi United vs Marines FC (Stade de Kigali, 15h00)
  • Gicumbi FC vs AS Muhanga (Stade Mumena, 15h00)
  • Musanze FC vs Police FC (Stade Ubworoherane, 15h00)
  • Sunrise FC vs Mukura VS (Stade Nyagatare, 15h00)
  • Espoir FC vs SC Kiyovu (Stade Huye, 15h00)
    -* Heroes FC vs Etincelles FC (Stade bugesera, 15h00)
Abakinnyi babanje mu kibuga ku ruhande rwa Rayon Sports
Ababanjemo ku ruhande rwa AS Kigali
Ba kapiteni bombi: Rutanga Eric na Niyonzima Haruna bafite ibyapa bigamije ubukangurambaga ku mutekano wo mu muhanda
Abatoza ba Rayon Sports: Javier Martinez Espinoza, Kirasa Alain na Mwiseneza Djamal
Abatoza bombi: Nshimiyimana Eric na Javier Espinoza basuhuzanya mbere y'umukino
Abasimbura ba AS Kigali
Abasimbura ba Rayon Sports
Michael Sarpong yagoye ubwugarizi bwa AS Kigali
Kapiteni wa Rayon Sports, Rutanga Eric arengura umupira
Iranzi Jean Claude yitegura gutera koruneri
Oumar Sidibe atwara umupira Nsabimana Eric
Ntamuhanga Tumaini ahabwa ikarita y'umuhondo n'umusifuzi Twagirumukiza
Michael Sarpong ahanganiye umupira na Rurangwa Mossi
Umuyobozi wa Yanga SC, Dr Mshindo Msola yarebye uyu mukino
Umuyobozi wa Tekinike wa Rayon Sports, Kayiranga Baptiste yarebye uyu mukino
Commodore Olokwei yari yongeye kugirirwa icyizere cyo kubanza mu kibuga
Haruna Niyonzima ahanganiye umupira na Radu
Haruna Niyonzima ahanganiye umupira na Radu
Kimenyi Yves yishimira igitego cya mbere cyatsinzwe na Mugisha Gilbert
Ulimwengu Jules wa Rayon Sports (ubanza ibumoso) ntabwo arabona ibyangombwa byo gukorera mu Rwanda nyuma yo kwamburwa indangamuntu
Sarpong yitegura gutera penaliti yavuyemo igitego cya kabiri
Bakame ntiyabashije kugarura umupira

Amafoto: Usanase Anitha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza