Rayon Sports yashyizwe mu kato nyuma y’uko abakinnyi bane basanganywe COVID-19

Yanditswe na Eric Tony Ukurikiyimfura
Kuya 4 Ukuboza 2020 saa 10:32
Yasuwe :
0 0

Ikipe yose ya Rayon Sports yashyizwe mu kato nyuma y’uko bigaragaye ko hari abakinnyi bayo bane banduye COVID-19 kuri uyu wa Gatanu.

Rayon Sports yakinnye na Rutsiro FC kuri uyu wa Gatanu mu mukino w’umunsi wa mbere wa Shampiyona warangiye ari igitego 1-1.

Nyuma y’uyu mukino nibwo byamenyekanye ko hari abakinnyi bane ba Rayon Sports basanzwemo COVID-19 barimo batatu bakinnye umukino wa Rutsiro FC.

Amakuru IGIHE yamenye ni uko abari bahagarariye FERWAFA i Rubavu bananiwe kumvikana ku kuba umukino wahagarikwa mu gice cya kabiri ubwo byamenyekanaga ko hari abakinnyi banduye.

Umwe mu bakinnyi ba Rayon Sports yemereye IGIHE ko hari abakinnyi [bane] basanzwemo COVID-19 ndetse ikipe yose yatashye iherekejwe na Polisi y’Igihugu kugira ngo ijye mu kato mu Nzove, aho isanzwe ikorera umwiherero.

Rayon Sports yaherukaga gupimisha abakinnyi n’abakozi bayo ku wa Gatatu mu gihe yerekeje i Rubavu ku wa Kane. Biteganyijwe ko iyi kipe yongera gupimwa harebwa uko abakinnyi bahagaze.

Ibaye ikipe ya kabiri ivuzwemo COVID-19 nyuma ya Amagaju FC yarwaje abakinnyi 11 bigatuma inasezererwa mu mikino ya playoffs yo guhatanira kuzamuka mu Cyiciro cya Mbere mu kwezi gushize.

FERWAFA yasabye amakipe kujya ayitangariza ibyavuye mu bipimo bya COVID-19 byafashwe abakinnyi, gusa ntihajya hatangazwa ibyabivuyemo.

Bamwe mu bakinnyi ba Rayon Sports basanzwemo COVID-19 bituma ikipe ishyirwa mu kato
Rayon Sports yanganyije na Rutsiro FC kuri uyu wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .