00:00:00 IGIHE NETWORK KN KINYARWANDA EN ENGLISH FR FRANCAIS

Ababyeyi ba Novak Djokovic bashinje Australia kubamba umuhungu wabo

Yanditswe na Eric Tony Ukurikiyimfura
Kuya 7 January 2022 saa 10:17
Yasuwe :

Ababyeyi b’umukinnyi wa mbere ku Isi muri Tennis, Novak Djokovic, bashinje abayobozi ba Australia kubamba umuhungu wabo nka Yezu Kirisitu nyuma y’uko yashyizwe muri hoteli isanzwe icumbikira impunzi cyangwa abasaba ubuhungiro.

Novak Djokovic wari witabiriye Australian Open izaba hagati ya tariki ya 17 n’iya 30 Mutarama 2022, yimwe Visa nyuma yo kugera i Melbourne ku wa Gatatu kubera ko atikingije COVID-19 nubwo yari yashyiriweho umwihariko n’abaganga.

Kuri ubu, abanyamategeko be bamaze kumubonera uruhushya rumwemerera kuguma muri Australia ariko icyemezo cya nyuma kizafatwa n’urukiko ku wa Mbere.

Umuryango w’uyu mukinnyi wagiye mu itangazamakuru ku wa Kane, aho se wa Djokovic, Srdjan, yakoresheje amagambo akomeye avuga uburyo umuhungu we afashwe nabi muri Australia.

Ati “Yezu yabambwe ku musaraba anakorerwa byinshi, arihangana, aracyariho muri twe. Bari kugerageza kubamba Novak muri ubwo buryo, kumusuzugura, kumupfukamisha no kumukorera buri kimwe.”

Srdjan yibasiye kandi Minisitiri w’Intebe wa Australia, Scott Morrison, ko ari we uri inyuma y’ibiri kuba ku muhungu we.

Ati “Wowe, Minisitiri w’Intebe w’ikirangirire mu gihugu cya kure, gisanzwe ari cyiza, bari kugendera ku mahame yawe, kandi ntaho ahuriye natwe cyangwa amahame yacu. Turi abantu ariko wowe si ko bimeze.”

Nyina wa Djokovic, Dijana, yavuze ko bavugishije umuhungu wabo ndetse aho acumbikiwe atari heza ku buryo agorwa no gusinzira.

Ati “Ahantu acumbikiwe hateye ubwoba. Ni hoteli nto ijyamo abinjira n’abasohoka. Habamo udukoko dutandukanye ndetse n’ibyo kurya byaho biteye ubwoba. Ntibashaka kumuha amahirwe yo kujya muri hoteli nziza kurushaho cyangwa ngo yikodeshereze.”

Amagambo y’uyu mubyeyi yashyigikiwe na Perezida wa Serbia, Aleksandar Vučić, wavuze ko igihugu cyose kiri inyuma ya Djokovic.

Ati “Serbia yose iri kumwe na we kandi abayobozi bacu bari gufata ingamba zose kugira ngo uburyo bubi umukinnyi mwiza ku Isi muri Tennis afashwemo burangire.”

Novak Djokovic w’imyaka 34, ni we watwaye Australian Open mu 2021 ndetse byari ku nshuro ya gatatu yikurikiranya yegukana iri rushanwa.

Uyu mugabo umaze gutwara Australian Open inshuro icyenda, amaze kwegukana Grand Slam 20 anganya na Rafael Nadal ndetse na Roger Federer nk’abakinnyi b’ibihangange ku Isi muri Tennis.

Ababyeyi ba Novak Djokovic bibasiye abayobozi ba Australia babashinja kubamba umuhungu wabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .