00:00:00 IGIHE NETWORK KN KINYARWANDA EN ENGLISH FR FRANCAIS

Abagize uruhare mu guteza imbere imikino y’abafite ubumuga bashimiwe

Yanditswe na Eric Tony Ukurikiyimfura
Kuya 4 December 2021 saa 08:43
Yasuwe :

Mu rwego rwo kwizihiza umunsi mpuzamahanga w’abantu bafite ubumuga ku Isi uba tariki 3 Ukuboza buri mwaka, ku rwego rw’Igihugu wabereye mu Karere ka Rubavu, hashimiwe abagize uruhare mu guteza imbere imikino y’abantu bafite ubumuga.

Ibi birori byo kwizihiza umunsi mpuzamahanga w’abantu bafite ubumuga byabereye kuri Stade Umuganda, byaranzwe n’indirimbo z’abantu bafite ubumuga, kwerekana ibikorwa n’imishinga bakoze mu gihe kandi hanakinwe imikino itandukanye.

Hakizimana Théogène ufite ubumuga bw’amaguru, uterura ibilo 205 mu mukino wa Para Power Lifting na bagenzi be bafite ubumuga butandukanye bakina imikino irimo Goalball y’abatabona, Sitball na Amputee Football bavuze ko bishimira ko siporo yabafashije kuva mu bwigunge no kugaragaza impano zabo.

Byatumye bahagararira igihugu mu marushanwa mpuzamahanga atandukanye kandi begukana imidali.

Icyakora bavuga ko bagifite ikibazo cy’ibikoresho bigezweho kugira ngo barusheho gukabya inzozi zabo mu gihe ubushobozi aba abakinnyi bagaragaje bwongeye kwerekana ko kugira ubumuga atari ukubura ubushobozi.

Umuyobozi wa Komite y’Igihugu y’Imikino y’Abafite abamuga (NPC Rwanda), Murema Jean Baptiste, yavuze ko kuri ubu mu Rwanda hari imikino 20 ikinwa n’abafite ubumuga.

Ku kibazo cy’ibikoresho, Murema yemeza ko gihari koko ariko ko bakomeje gukora ubuvuguzi kandi ko bizeye ko bizaboneka.

Ati “Imbogamizi ntizabura, nubwo siporo y’u Rwanda hari aho tugeze ariko haracyari ikibazo cy’ibikoresho kandi mu mikino yose. Ku bafite ubumuga usanga bihenda kandi bitoroshye kubibona, hari imikino tudafungura mu Rwanda kubera ko ibikoresho byayo bihenze.”

Yakomeje agira ati “Ikindi ni abantu bafite ubumenyi, bazobereye muri siporo z’abafite ubumuga, na yo ni indi mbogamizi. Tuganira n’abafatanyabikorwa batandukanye kandi turasaba ko bakwiyongera kugira ngo tubashe kugira bike tugeraho.”

Muri ibi birori, hashimiwe kandi abagize uruhare mu guteza imbere imikino y’abantu bafite ubumuga kuva Komite y’Igihugu y’Imikino y’Abafite ubumuga mu Rwanda (NPC Rwanda) kuva ishinzwe mu 2002.

Abashimiwe ni Rwaka Pierre Claver, Bizimana Dominique, Nzeyimana Célestin, Mutangana Dieudonné, Gatera , Rudasingwa Emmanuel, Karasira Eric, Mukanyemanzi Adèle, Rangira Joseph, Butoyi Jean, Nkundabera Jean de Dieu, Kanimba Donatille, Uwitije Claudine, Rwagasana César, Muvunyi Hermas, MINISPORTS, NCPD, NUDOR, RNOSC n’Ikipe y’Igihugu ya Sitting Volleyball.

Abafite ubumuga bakinnye imikino itandukanye ubwo hizihizwaga umunsi mpuzamahanga wabahariwe ku wa Gatanu, tariki ya 3 Ukuboza 2021
Abantu batandukanye bagize uruhare mu guteza imbere imikino y'abafite ubumuga kuva NPC Rwanda ishinzwe, barashimiwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .