00:00:00 IGIHE NETWORK KN KINYARWANDA EN ENGLISH FR FRANCAIS

Amakipe ya RwandAir, NISR na Volcano yahize ay’ibindi bigo mu marushanwa y’abakozi

Yanditswe na IGIHE
Kuya 20 December 2021 saa 04:43
Yasuwe :

Mu gusoza imikino yahuje ibigo bya Leta n’iby’igenga muri uyu mwaka wa 2021, ikipe ya RwandAir yegukanye igikombe muri Basketball, Ikigo cy’Igihugu cy’Ibarurishamibare (NISR) gihiga ibindi muri ruhago mu gihe Volcano yatsinze Banki ya Kigali mu bigo byigenga.

Iyi mikino yari imaze ibyumweru bine, yasojwe ku Cyumweru, tariki 19 Ukuboza 2021, aho imikino ya nyuma yakiniwe ku bibuga bitandukanye ariko biherereye mu gice cy’i Remera.

Hakinwe imikino itatu irimo umupira w’amaguru, Volleyball mu bagabo n‘abagore ndetse na Basketball mu bagabo.

Iyi shampiyona itegurwa n’Ishyirahamwe ry’Imikino y’Abakozi mu Rwanda (ARPST) yari yitabiriwe n’amakipe 33.

Yakinwe mu buryo budasanzwe kubera icyorezo cya COVID-19 aho hafashwe amakipe ane yari yabaye aya mbere mbere y’umwaduko wa COVID-19 mu bigo bya Leta n’ibyigenga.

Imikino ya nyuma mu mupira w’amaguru yakiniwe kuri Stade Amahoro guhera saa tanu z’amanywa, habanza gukina ibigo bya Leta bifite abakozi 100 kuzamura (Category B).

Muri iki cyiciro, Ikigo cy’Igihugu cy’Ibarurishamibare (NISR) cyegukanye igikombe gitsinze RwandAir igitego 1-0 cyinjijwe na Nsengiyumva David ku munota wa 78 ubwo yarenzaga umunyezamu Murasandonyi Jean Jacques wari wasohotse nabi.

Hahise hakurikiraho umukino wahuje Banki ya Kigali (BK) na Sosiyete itwara abantu n’ibintu, Volcano Ltd. Muri iki cyiciro cy’ibigo byigenga, habanje gukinwa umukino ubanza hagati y’izi kipe zombi.

Volcano FC yegukanye igikombe nyuma yo kunganya na BK FC ibitego 2-2 ni nyuma y’uko mu mukino ubanza, yari yatsinze Banki ya Kigali ibitego 2-0 kandi hagombaga kubarwa imikino yombi yazihuje.

Ikigo cy’Ikoranabuhanga n’Isakazabumenyi (RISA) nyuma yo gutsinda Minisiteri y’Ibikorwaremezo (MININFRA) ibitego 4-1, cyegukanye igikombe mu bigo bya Leta bifite abakozi bari munsi ya 100.

Umunyamabanga Uhora muri Minisiteri ya Siporo, Shema Maboko Didier, yavuze ko imikino y’abakozi yarushijeho guhuza abantu ariko ashimangira ko bitari byoroshye kubera ibihe bikomeye bya COVID-19.

Ati “Ntekereza ko ingorane nyinshi ari COVID-19. Muzi ko hatangiye ibigo bya Leta gusa ariko haza kuzamo n’ibyigenga. Turizera ko nidukomeza kurwanya kino cyorezo amakipe azongera kuba menshi.”

Visi Perezida w’Ishyirahamwe ry’Imikino y’Abakozi mu Rwanda (ARPST), Ntamuturano Désiré, yavuze ko bishimiye uko shampiyona yagenze nubwo yakinwe mu gihe gito kandi mu buryo budasanzwe.

Ati “Nyuma y‘imyaka hafi ibiri nibura turishimira ko abantu bongeye bagahura. Ikindi twishimiye ni uko ibigo byitabiriye byubahirizaga ingamba zose zo kwirinda COVID-19 kandi byatweretse ko bishoboka. Bitweretse ko igihe twamaze tudakina ntacyo byahungabanyije cyane.”

Uyu muyobozi yakomeje avuga bateganya kongera imikino ariko muri iyi Shyirahamwe bagifite imbogamizi y’ibibuga, akaba yasabye ibigo kujya bigerageza mu bushobozi bifite, bigakodesha ibibuga byakiriraho imikino cyangwa bikajya byakirira ku bibuga bibasanzwe byitorezaho.

Amakipe atatu ya mbere mu mupira w’amaguru azahagararira u Rwanda mu mikino mpuzamahanga izabera muri Algérie muri Werurwe 2022 ni NISR FC, RwandAir FC na Volcano FC.

Uko indi mikino yagenze:

Volleyball:

  • BPR 3-1 BK (abagabo)
  • MOD 3-0 RRA (abagore)

Basketball:

  • RMB 32-38 RTDA
  • Rwandair 54-48 IPRC-Ngoma
  • BK 62-25 HIS (mu bigo byigenga)
Minisiteri y'Ingabo yegukanye igikombe cya Volleyball mu cyiciro cy'abagore
RwandAir FC ntabwo yahiriwe muri uyu mwaka
Umukino wahuje NISR na RwandAir wari indyankurye
Umunyezamu wa RwandAir FC yari yakuyemo imipira ikomeye
Volcano FC yegukanye igikombe nyuma yo kunganya na BK 2-2
RwandAir ni yo yegukanye icya Basketball
Volcano Ltd yafashije ababaye abakinnyi kubona akazi
RwandAir yanegukanye igikombe muri Volleyball

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .