00:00:00 IGIHE NETWORK KN KINYARWANDA EN ENGLISH FR FRANCAIS

Djokovic yemeye ko atishyize mu kato kandi arwaye COVID-19

Yanditswe na Eric Tony Ukurikiyimfura
Kuya 12 January 2022 saa 09:57
Yasuwe :

Nimero ya mbere ku Isi muri Tennis, Novak Djokovic, yemeye ko yarenze ku mabwiriza yo kwishyira mu kato nyuma yo gusanga arwaye COVID-19 mu kwezi gushize, avuga ko yakoze ikosa ritari rikwiye.

Mu butumwa yashyize kuri Instagram kuri uyu wa Gatatu, Djokovic yemeye ko yagiye guhurira n’umunyamakuru mu kiganiro hashize iminsi ibiri asanzwemo COVID-19 ku wa 16 Ukuboza.

Ati “Ndemera ko narinkwiye kwimura gahunda. Numvise ngomba gukorana ikiganiro na L’Equipe kuko nanze gutenguha umunyamakuru. Nakoze ku buryo nshyiramo intera no kwambara agapfukamunwa keretse ubwo hafatwaga ifoto.”

Uyu Munya-Serbia yatangaje ibi mu gihe guverinoma ya Australia ikomeje gushaka uburyo yamwirukana ku butaka bwayo kuko atikingije COVID-19.

Muri ubu butumwa bwe, Djokovic yanenze umukozi we wakoze ikosa ryo kuzuza nabi urupapuro rumwemerera kwinjira muri Australia bikaba byaratumye atangira gukorwaho iperereza.

Hari ahavugaga ko umuntu ushaka kwerekeza muri Australia nta handi agomba kuba yaragiye mu minsi 14 yabanje, nyamara hari amakuru avuga ko yabanje kujya muri Serbia na Espagne muri iyo minsi.

Djokovic yagize ati “Umukozi wanjye yasabye imbabazi ku makosa yabaye ubwo yahitagamo igisubizo gikwiye mu kuzuza urupapuro rw’urugendo. Ni ikosa ry’umuntu kandi ntiryari rigambiriwe.”

Yakomeje agira ati “Ikipe yanjye yatanze andi makuru kuri Guverinoma ya Australia kugira ngo ikibazo gisobanuke.”

Ku wa Kabiri, urwego rushinzwe imipaka muri Australia rwatangaje ko ruri gukora iperereza kuri Djokovic niba yaratanze amakuru atari yo ku buryo yakongera kwimwa Visa ku nshuro ya kabiri.

Mu gihe yakwemererwa gukina ndetse agatwara Australian Open izaba tariki ya 17-30 Mutarama 2022, Djokovic yaba akoze amateka yo kuba umukinnyi umaze kwegukana amarushanwa menshi akomeye.

Novak Djokovic yavuze ko yakoze amakosa yo kutishyira mu kato kandi azi ko yanduye COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .