00:00:00 IGIHE NETWORK KN KINYARWANDA EN ENGLISH FR FRANCAIS

Ibibazo by’ingutu bitegereje Novak Djokovic mu rubanza

Yanditswe na Eric Tony Ukurikiyimfura
Kuya 9 January 2022 saa 06:58
Yasuwe :

Nimero ya mbere ku Isi muri Tennis, Nova Djokovic, ashobora guhatwa ibibazo mu rubanza ruzaba ku wa Mbere nyuma y’uko abanyamategeko be bagaragaje ko yanduye COVID-19 ku wa 16 Ukuboza 2021, bigatuma atikingiza mu gihe hari amafoto yagiye hanze amugaragaza yitabiriye ibikorwa bitandukanye bukeye bwaho.

Djokovic yimwe Visa yo kwinjira muri Australia ubwo yari agiye kwitabira Australian Open, ashyirwa muri hoteli y’i Melbourne mu gihe hatarasuzumwa icyashingiweho ahabwa umwihariko wo kwemererwa kwitabira iri rushanwa rizaba tariki ya 17-30 Mutarama 2022 kandi atarikingije COVID-19.

Ku wa Gatandatu, abanyamategeko be bateguye inyandiko ya paji 35 igaragaza ko umukiliya wabo akwiye kwemererwa kwinjira muri Australia ndetse agakina Australian Open, ariko umwanzuro uzafatirwa mu rubanza ruzatangira ku wa Mbere.

Muri iyi nyandiko, abanyamategeko bagaragaza ko impamvu Djokovic atikingije COVID-19 ari uko yanduye iki cyorezo ku wa 16 Ukuboza 2021 nubwo hatagaragazwa niba ari bwo yakiriye ibisubizo by’ikizamini cya PCR yakorewe.

Igikomeza ibibazo bya Djokovic ni uko yafotowe yagiye mu birori byo kumushimira i Belgrade bukeye bwaho, ndetse agaragara atambaye agapfukamunwa aho yari yahuye n’abana afasha. Amabwiriza yo muri Serbia ategeka ko umuntu agomba kwishyira mu kato mu gihe cy’iminsi 14 nyuma yo kwandura COVID-19.

Ikinyamakuru cyo mu Bufaransa, L’Equipe, cyatangaje ko Djokovic yitabiriye umuhango wacyo wa “Champion of Champions” akifotozanya n’abandi mu gihe hari n’amashusho yafashwe akina Tennis n’abandi bantu ku muhanda kuri Noheli.

Irindi pfundo ry’ibisobanuro uyu mugabo w’imyaka 34 agomba gutanga ni ukuba abashinzwe Tennis muri Australia bari barashyizeho itariki ya 10 Ukuboza nk’umunsi wa nyuma wo gusaba umwihariko watuma umuntu yitabira Australian Open atarikingije COVID-19.

Urubanza rwa Djokovic ruraba mu ijoro rishyira ku wa Mbere, ariko we araza kuba ari muri hoteli ubwo biraza kuba byemezwa niba yemererwa kuguma muri Australia cyangwa niba asubizwa iwabo muri Serbia.

Iminsi ibiri mbere y’uko Djokovic asangwamo COVID-19, yitabiriye umukino wa Basketball wabereye mu nzu atambaye agapfukamunwa, wari wahuje Srvena Zvezda na Barcelone. Hari ifoto imugaragaza ari kumwe na Nigel Hayes-Davis ukinira iyi kipe yo muri Espagne kandi byatangajwe ko yanduye COVID-19 ku wa 16 Ukuboza.

Abanyamategeko be bagaragaza ko kubera ibimenyetso yari afite, Djokovic yabonye urwandiko rujyanye no gusaba kwitabira Australian Open ku wa 1 Mutarama 2022.

Uyu mukinnyi yahaye akazi abanyamategeko bakomeye i Melbourne kugira ngo babashe kwinjira mu mabwiriza yo kwirinda ikwirakwira rya COVID-19 muri Australia.

Aba banyamategeko bagaragaje ko umukiliya wabo yabujijwe kugira icyo akora kuva ubwo yageraga muri Australia mbere ya saa Sita z’ijoro kugeza saa Mbiri n’igice za mu gitondo.

Guverinoma ya Australia yari yasabye ko urukiko rwakwimurira urubanza rwa Djokovic ku wa Gatatu, ariko umucamanza Antony Kelly atesha agaciro ubu busabe, ashimangira ko ruzaba guhera ku wa Mbere.

Abanyamategeko ba Novak Djokovic bashobora kugorwa no gusobanura uburyo yitabiriye ibirori bitandukanye umunsi umwe nyuma yo kwandura COVID-19
Djokovic yagaragaye kenshi atambaye agapfukamunwa mu cyumweru bivugwa ko yanduriyemo COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .