00:00:00 IGIHE NETWORK KN KINYARWANDA EN ENGLISH FR FRANCAIS

Ishimwe Claudette yabaye uwa mbere, ariko akurwa mu irushanwa ryo koga muri Shampiyona y’Isi

Yanditswe na Eric Tony Ukurikiyimfura
Kuya 17 December 2021 saa 12:31
Yasuwe :

Umunyarwanda Ishimwe Claudette yabaye uwa mbere mu isibo (heat) yo koga metero 50 makeri muri Shampiyona y’Isi iri kubera i Abu Dhabi muri Leta Zunze Ubumwe z’Abarabu, ariko arasezererwa nyuma y’uko camera zigaragaje ko hari amakosa yakoze mu koga kwe.

Muri Shampiyona y’Isi y’Umukino wo Koga iri kuba ku nshuro ya 15 i Abu Dhabi hagati ya tariki ya 16 n’iya 21 Ukuboza 2021, u Rwanda ruhagarariwe n’abakinnyi batatu aribo Ishimwe Claudette, Maniraguha Eloi na Niyibizi Cédric.

Ku munsi wayo wa mbere, ku wa Kane tariki ya 16 Ukuboza, ni bwo Ishimwe Claudette yarushanyijwe mu koga makeri “Breaststroke”, aba uwa mbere mu isibo ya mbere, aho yakoresheje amasegonda 42 n’ibice bitatu, asize Umunya-Djibouti Naima-Zahra Amison bakinanye ari babiri.

Ishimwe yashimiwe n’Ishyirahamwe Nyarwanda ry’umukino wo Koga ndetse na Perezida waryo, Girimbabazi Rugabira Pamela, mu butumwa bwashyizwe kuri Twitter.

Girimbabazi yagize ati “Komerezaho mukinnyi wacu, nta kidashoboka. Ndabizi ko ari ikibazo cy’igihe, wakoze neza.”

Gusa, nubwo uyu mukobwa yashimiwe n’abari i Kigali, i Abu Dhabi ho byagenze ukundi kuko yahise akurwa mu irushanwa nyuma yo gusanga hari amakosa yakoze ubwo yogaga.

Ishimwe usanzwe abarizwa muri Cercle Sportif de Karongi, ni umwe mu bakinnyi barindwi bakoze amakosa yatumye ibihe bari bakoresheje biteshwa agaciro mu masibo (heats) umunani yakinnye ku wa Kane.

Mu koga makeri, hari igihe usanga umukinnyi akurwa mu irushanwa bitewe n’uburyo yatwaye amaguru.

Abakinnyi 15 barangajwe imbere n’Umunya-Jamaica Alia Atkinson wakoresheje amasegonda 29,55 ni bo batsindiye gukomeza muri ½ cyahise gikinwa ku wa Kane, hasigaramo abakinnyi umunani gusa.

Ishimwe yakinanye na Naima-Zahra Amison wo muri Djibouti ari babiri gusa kuko Umunya-Guinée Equatoriale, Rita Acaba Ocomo, atakinnye. Bose uko ari batatu bari mu isibo (heat) ya mbere kuko ari bo bari bafite ibihe biri hasi kurusha abandi.

Mu marushanwa nk’aya, abakinnyi bahurizwa hamwe mu masibo hagendewe ku bihe basanzwe bafite. Muri Shampiyona Nyafurika ya CANA, iheruka kubera muri Ghana mu Ukwakira, Ishimwe yari yakoresheje amasegonda 46 n’ibice 90

Uyu mukobwa w’imyaka 16 azasubira muri piscine ku wa Mbere, tariki ya 20 Ukuboza, aho azarushanwa koga metero 50 mu bizwi nko gukura umusomyo “Freestyle”.

Maniraguha Eloi azarushanwa bwa mbere ku wa Gatandatu muri metero 50 za Freestyle mu gihe ku wa Mbere azarushanwa muri metero 100.

Undi ni Niyibizi Cédric, we uzarushanwa bwa mbere ku Cyumweru mu koga metero 50 bunyugunyugu (Butterfly) mu gihe kandi azoga metero 50 makeri (Breaststroke) ku wa Mbere.

Ishimwe Claudette yabaye uwa mbere muri 'heat' ya mbere y'ijonjora rya mbere ryo koga metero 50 makeri muri Shampiyona y'Isi iri kuba ku nshuro ya 15 i Abu Dhabi
Ibihe bya Ishimwe Claudette byateshejwe agaciro (akurwa mu irushanwa) nyuma yo gusanga hari amakosa yakoze mu koga kwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .