00:00:00 IGIHE NETWORK KN KINYARWANDA EN ENGLISH FR FRANCAIS

Max Verstappen yongereye amasezerano y’igihe kirekire muri Red Bull Racing

Yanditswe na Bukuru JC
Kuya 4 March 2022 saa 11:20
Yasuwe :

Nyuma yo kwegukana Shampiyona y’Isi ya mbere ya Formula 1 mu mwaka ushize, Max Verstappen yongereye amasezerano y’igihe kirekire azageza mu 2028 akinira Red Bull Racing.

Amasezerano asanzwe y’uyu Muholandi yagombaga kurangirana n’umwaka w’imikino wa 2023 ariko ku myaka 24 yahisemo gukomezanya n’Ikipe ya Red Bull Racing.

Max Verstappen yavuze ko atagowe no gufata icyemezo cyo kongera aya masezerano y’imyaka itanu.

Ati “Mu by’ukuri nishimira kuba mu bagize Ikipe ya Oracle Red Bull Racing. Guhitamo kugumana na yo kugeza mu 2028 byari icyemezo cyoroshye.”

Yakomeje agira ati “Nkunda iyi kipe kandi umwaka ushize wari utangaje. Intego yacu kuva dutangiye gukorana mu 2016 byari ugutwara shampiyona kandi twabigezeho. Ubu ni uguharanira gukomezanya umwanya wa mbere muri aya masiganwa y’imodoka.”

Umuyobozi wa Red Bull Racing, Christian Horner, yavuze ko Verstappen ari muri gahunda zabo z’igihe kirekire.

Ati “Intego yacu ni uguhagarara kuri Shampiyona y’Isi yatwawe na Max ariko ibi birerekana ko ari muri gahunda yacu y’igihe kirekire.”

Verstappen yageze muri Red Bull mu 2015, abanza kunyura muri Toro Rosso ifatwa nk’ikipe yayo ya kabiri aho yatangiye gukinira F1.

Yazamuwe muri Red Bull Racing mu 2016 aho yatangiye kwigaragaza mu bapilote bakomeye muri Formula 1.

Mu mwaka ushize ni bwo yegukanye Shampiyona y’Isi bwa mbere nyuma yo gutsinda Lewis Hamilton muri Grand Prix ya nyuma yabereye i Abu Dhabi.

Max Verstappen azatangira guhagarara ku gikombe yatwaye tariki ya 20 Werurwe 2022 ubwo hazaba hakinwa Grand Prix izabera i Bahrain.

Bivugwa ko uyu Muholandi yahawe miliyoni 40£ kugira ngo yemere kongera amasezerano.

Max Verstappen yongereye amasezerano y'imyaka itanu muri Red Bull Racing
Verstappen w'imyaka 24, afite intego yo guhagarara kuri Shampiyona y'Isi ya Formula 1 yatwaye mu 2021
Ubuyobozi bwa Red Bull Racing bwavuze ko Max Verstappen ari muri gahunda zayo z'igihe kirekire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .