Mike Tyson wamamaye mu iteramakofe yatangaje benshi avuga ko gupfa bimurutira kubaho

Yanditswe na Eric Tony Ukurikiyimfura
Kuya 20 Werurwe 2020 saa 04:40
Yasuwe :
0 0

Mike Tyson wabaye ikirangirire mu mukino w’iteramakofe, avuga ko atigeze atinya urupfu mu gihe cyose yari mu rurwaniro ndetse kuri ubu icyamubera cyiza ari uko yapfa aho gukomeza kubaho.

Tyson w’imyaka 53, yabaye umukinnyi ukomeye mu iteramakofe ndetse akaba yarinjiye muri uyu mukino akiri muto cyane ,aho yegukanye igikombe cya mbere mu 1986, ubwo yari afite imyaka 20 n’amezi ane.

Mu kiganiro yagiranye na The Sportsman, Tyson yavuze ko yahoraga yiteze gupfa mu gihe cyose yabaga ari mu myitozo cyangwa mu kibuga.

Ati “Nari mbizi ko byashobokaga ko napfa mu myitozo, mu gihe cy’umurwano. Ibyo nari mbizi.”

“Gusa ntabwo byanteye ubwoba kuko natekerezaga ko niba hari umuntu uza gupfa, ari njye uza gukora ubwo bwicanyi. Uko kwigirira icyizere byambereye intwaro yankijije.”

"Ariko ubu, nkurikije ubunararibonye bwanjye, nkurikije ibyo nizera, uko nzi byinshi ku bitabaho, ni ko nifuza gupfa."

Abajijwe niba ategereje urupfu, Mike Tyson mu magambo ye yagize ati “Yego. Ntabwo mbitinya.”

"Kubaho bishobora kuba bigoye kuruta gupfa kuri njye. Kubyizera. Sinzi niba ari ukuri. Kubera ko kubaho bisaba ubutwari bwinshi. Nta butwari, ntushobora kubaho.”

Mike Tyson ni we mukinnyi wa mbere w’iteramakofe wegukanye imikandara ya WBA, WBC na IBF.

Yamaze imyaka itatu muri gereza nyuma yo guhamwa n’icyaha cyo gufata ku ngufu mu 1992.

Mu 1996, Tyson yatsinzwe na Evander Holyfield, maze amuruma ugutwi mu mukino basubiyemo nyuma y’umwaka.

Mike Tyson yavuze ko aho gukomeza kubaho yahitamo gupfa
Mike Tyson yabaye umukinnyi ukomeye w'iteramakofe kuva mu 1985 kugeza mu 2005

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .