Minisitiri Munyangaju yashimiye abakuye imidali mu mikino y’Isi y’abafite ubumuga bwo mu mutwe (Amafoto)

Yanditswe na Eric Tony Ukurikiyimfura
Kuya 6 Ukuboza 2019 saa 10:04
Yasuwe :
0 0

Minisitiri wa Siporo, Munyangaju Aurore Mimosa, yashimiye abakinnyi baheruka kwegukana imidali mu mikino y’Isi y’abafite ubumuga bwo mu mutwe yabereye i Abu Dhabi muri Leta zunze Ubumwe z’Abarabu muri Werurwe.

Muri iyi mikino u Rwanda rwari ruhagarariwemo n’abakinnyi 26 barimo bane basiganwa ku maguru, batanu mu mukino wo Koga, babiri b’umukino wa Boccia n’ikipe y’Umupira w’amaguru y’Abahungu ya Kamonyi, imidali umunani ni yo yatashye mu rwa Gasabo, irimo ibiri ya Zahabu, ibiri ya Feza n’indi ine y’Umuringa.

Umuhango wo kwishimira iyi midali no kwakira abakinnyi bayitwaye wabaye kuri uyu wa Kane muri Hotel des Mille Collines mu Mujyi wa Kigali, aho witabiriwe na Minisitiri wa Siporo, Munyangaju Aurore Mimosa, washimiye aba bakinnyi uko bitwaye, anabasezeranya ko Leta y’u Rwanda izakomeza kubashyigikira.

Ati’’ Turabashimira uburyo mwitwaye ndetse n’ababyeyi babashyigikira mu bikorwa bigamije guteza imbere igihugu cyacu. Uyu munsi duhurijwe hano na Siporo ariko ndangira ngo mbibutse ko Siporo ari inzira yo gushimangira ihame ryo kudahezwa aho buri muntu wese ufite ubumuga ubwo ari bwo bwose, agaragaza ubushobozi bwe nta nzitizi n’imwe.’’

Minisitiri Munyangaju yavuze ko Leta y’u Rwanda izakomeza gufatanya n’ababyeyi b’abana no kubashyigikira kugira ngo babone ko ari abana nk’abandi ndetse na bo bashobora kugaragaza impano zabo nubwo bafite ubumuga.

Umuyobozi wa Special Olympics mu Rwanda, umuryango wita ku bana bafite ubumuga bwo mu mutwe binyuze mu mikino, Pasiteri Sangwa Deus, yavuze ko kuri ubu bafite abakinnyi 18,100 ndetse bafite intego yo kwitwara neza mu mikino itaha izabera mu Misiri.

Ati’’ Dufite n’indi mikino igiye gukomeza, dufite imikino ya Afurika izaba mu kwa mbere mu Misiri. Icyo tugiye gukora ni ukwitegura ku buryo tuzabona n’indi midali yiyongera ku yo twatwaye. Mu kwitegura imikino y’Isi tuzakira mu 2022, tuzatangira Shampiyona mu kwa kabiri.’’

Mushimiyimana Marceline watwaye umudali wa Zahabu mu gusiganwa metero 50 ku maguru, Sibomana na Irafasha Patience bavuze mu izina rya bagenzi babo, bavuze ko bishimiye uko bakiriwe ndetse n’uburyo bakomeje gufashwa kugaragaza impano zabo.

Kuri ubu u Rwanda ruri kwitegura imikino ya Afurika izabera i Cairo mu Misiri mu mwaka utaha ndetse n’iy’Isi ruzakira mu 2022.

Special Olympics Rwanda iteganya ko mu mwaka utaha, aba bakinnyi bafite ubumuga bwo mu mutwe bazaba bakina imikino irimo uwo gusiganwa ku magare no kujugunya ibiremereye, iziyongera ku mupira w’amaguru, Boccia, Koga, Volleyball, Basketball na Tennis ikinirwa ku meza.

Abanyarwanda bakuye imidali umunani mu mikino y'Isi y'abafite ubumuga bwo mu mutwe yabereye muri Leta Zunze Ubumwe z'Abarabu muri Werurwe. Bashimiwe na Minisitiri wa Siporo, Munyangaju Aurore Mimosa, mu muhango wabereye muri Hotel des Mille Collines ku wa 5 Ukuboza 2019
Minisitiri Munyangaju yashimiye aba bakinnyi batahanye imidali mu muhango wo kubakira wabaye kuri uyu wa Kane
Minisitiri Munyangaju afata ifoto hamwe n'abakinnyi batwaye imidali n'abandi bayobozi bari bitabiriye uyu muhango
Ababyeyi b'abana bashimiwe uburyo babashyigikira, bakabafasha kugaragaza impano zabo
Mushimiyimana Marceline watwaye umudali wa Zahabu mu gusiganwa metero 50 ku maguru
Irafasha Patience yatahanye umudali wa Feza
Abitabiriye uyu muhango basusurukijwe mu mbyino zitandukanye
Umuyobozi wa Special Olympics mu Rwanda, umuryango wita ku bana bafite ubumuga bwo mu mutwe binyuze mu mikino, Pasiteri Sangwa Deus, yavuze ko intego bafite ari ugutwara imidali myinshi mu marushanwa ataha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza