Mu Rwanda hatangijwe Tennis ikinirwa ku mucanga

Yanditswe na Eric Tony Ukurikiyimfura
Kuya 19 Ukuboza 2019 saa 01:46
Yasuwe :
0 0

Ishyirahamwe ry’Umukino wa Tennis mu Rwanda “RTF” ryatangije umukino mushya wa Tennis ikinirwa ku mucanga “Beach Tennis” , igikorwa cyabereye ku kibuga kiri inyuma ya Stade Amahoro i Remera kuri uyu wa Gatatu tariki ya 18 Ukuboza 2019.

Ikibuga gikinirwaho uyu mukino kigizwe na metero 16 ku munani, kikaba kigabanyijemo kabiri mu gihe ibikoresho byifashishwa ari udupira dutandukanye n’utwo bakinisha Tennis isanzwe ndetse na raketi (racket) zitandukanye.

Umugozi barenzaho agapira uba uri muri metero 1.7 uvuye hasi mu gihe uyu mukino ukinwa n’abakinnyi babiri nka Beach Volleyball cyangwa umwe kuri umwe, naho kubara amanota byo bikaba ari ibisanzwe.

Nyuma yo gutangiza uyu mukino, Perezida w’Ishyirahamwe Nyarwanda ry’Umukino wa Tennis, Karenzi Théoneste, yavuze ko ari umwe mu isanzwe ikinwa ku rwego mpuzamahanga ndetse bizeye ko n’Abanyarwanda bazabasha kuwukina.

Ati “Uyu ni umwe mu byiciro by’imikino ya Tennis bisabwa n’Ishyirahamwe ry’Umukino Mpuzamahanga wa Tennis, natwe rero turawutangije kandi ni umukino dukwiye kujyamo tukitwara neza, nizera ko tuzabishobora.”

Yakomeje avuga ko hari ibindi bihugu byawutangije muri aka Karere kandi ubu bigeze ku rwego rwo guhatana ku ruhando mpuzamahanga’

Mu Rwanda hagiye gushakwa abakinnyi bawo dore ko hari abana benshi basanzwe bakina Tennis.

Ati “Ntabwo wakina umukino ngo ugere aho utsinda utitoje bihagije, tugiye kubishyiramo ingufu bikorwe buri munsi tunategure abazajya bakina n’abatoza bazabafasha.”

Ntwari Thierry ushinzwe Iterambere ry’Umukino wa Tennis mu gace ka Afurika yo Hagati n’Uburasirazuba wari witabiriye iki gikorwa, yavuze ko ari ibintu bishimishije kuba u Rwanda rutangije uyu mukino.

Ati "Ndabyishimiye cyane kuko nyuma ya Kenya na Tanzania ubu n’u Rwanda rutangije uyu mukino ukinirwa ku mucanga, urumva ko bari muri gahunda za ITF zo kuzamura imikino yose. Batangiye Wheelchair Tennis ( intebe y’abafite ubumuga) none bageze kuri Beach Tennis.’’

Uyu mukino ukenera ibikoresho byihariye bitari ibisanzwe bikoreshwa muri Tennis isanzwe. Ibi birimo raketi ifite agaciro kagera ku €100, agapira kagura €10 ndetse n’umugozi “Net” ugura agera ku € 200.

Tennis yo ku mucanga yatangiye gukinwa mu 1970 mu Butaliyani , aho kugeza ubu uyu mukino umaze kugera mu bihugu birenga 50 ku Isi hose.

Perezida w'Ishyirahamwe rya Tennis mu Rwanda, Karenzi Théoneste akinana n'Umunyamabanga w'iri Shyirahamwe, Habimana Valens
Perezida wa RTF, Karenzi Théoneste (iburyo) ari kumwe na Ntwari Thierry (ibumoso) ushinzwe iterambere ry’umukino wa Tennis mu gace ka Afurika yo Hagati n’Uburasirazuba
Ikibuga cya Beach Tennis yatangijwe kuri uyu wa Gatatu kiri i Remera inyuma ya Stade Amahoro
Beach Tennis ishobora gukinwa n'abakinnyi babiri cyangwa umwe nk'uko no muri Tennis isanzwe bigenda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .