00:00:00 IGIHE NETWORK KN KINYARWANDA EN ENGLISH FR FRANCAIS

Mugisha Emmy agiye kwerekeza muri Académie ya Tennis mu Misiri

Yanditswe na Eric Tony Ukurikiyimfura
Kuya 1 February 2022 saa 02:53
Yasuwe :

Mugisha Emmy w’imyaka 20 azerekeza mu Misiri muri iki Cyumweru aho agiye kumara amezi atandatu yitoreza muri Extreme Tennis Academy yo mu Mujyi wa Ismailia.

Mugisha azahaguruka i Kigali ku wa Gatanu, tariki ya 4 Gashyantare 2022, ndetse yizeye ko nibigenda neza igihe azamara mu misiri kiziyongera.

Mu kiganiro yagiranye na IGIHE, yavuze ko kubona aya mahirwe yo kwitoreza mu Misiri bizamufasha kubona amarushanwa menshi mpuzamahanga.

Ati “Ni gahunda izamfasha kubona amarushanwa menshi mpuzamahanga kuko kiriya gihugu cyakira amarushanwa menshi, arenga 25 mu mwaka. Hari byinshi nzunguka, ni cyo ndi guharanira cyane kugira ngo nkine amarushanwa, umwanya wanjye uzamuke ku rutonde ngere ku rwego rwo hejuru mbe nabona n’andi mahirwe mu bindi bihugu.”

Yakomeje avuga ko hari izindi académie yashoboraga kwerekezamo mu Budage na Argentine, ariko akagorwa no kuba yarasabwaga kugaragara ku rutonde rw’abakina Tennis kinyamwuga.

Ati “Nzabona amahirwe yo gukina ayo marushanwa noneho nzamure amanota yanjye, mbone amahirwe yo kujya kuzikinamo.”

Uyu muhungu wakuze akunda imikinire ya Gasigwa Jean Claude [witabye Imana mu 2015] na Roger Federer, ngo yahisemo gukina Tennis mu 2012 nyuma yo kuvunikira mu mupira w’amaguru yakundaga cyane.

Yagize ati “Natangiye gukina Tennis mfite imyaka icyenda mu 2012. Nayitangiye maze guhura n’imvune mu mupira w’amaguru nakundaga cyane, ariko mfata icyemezo cyo gukina umukino w’umuntu ku giti cye, nkina Tennis.”

Intego za Mugisha ni uko azaba mu bakinnyi 500 beza ku Isi nk’uko yabigarutseho muri iki kiganiro yihariye yagiranye na IGIHE.

Ati “Intego mfite ni ukuza mu bakinnyi 500 ba mbere ku Isi muri Tennis, nkitwara neza, nkakina amarushanwa menshi kandi nkahesha igihugu cyanjye ishema.”

Mu 2018 ni bwo Mugisha Emmy yatangiye gukinira IPRC Kigali Tennis Academy aho yize ibijyanye na gukora imashini “Mechanical Engineering” muri iri shuri ry’ubumenyi ngiro.

Mugisha Emmy yizeye ko kujya gukina muri Académie yo mu Misiri ari intangiriro yo kugera ku nzozi afite zo kuba umukinnyi ukomeye muri Tennis ku Isi
Mu 2017, Mugisha yitabiriye irushanwa ryo #Kwibuka23 atsindirwa ku mukino wa nyuma n’umukinnyi wo muri Repubulika Iharanira Demokarasi ya Congo
Biteganyijwe ko Mugisha azamara amezi atandatu mu Misiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .