00:00:00 IGIHE NETWORK KN KINYARWANDA EN ENGLISH FR FRANCAIS

Musanze yatangiye neza muri Shampiyona ya Boccia

Yanditswe na Eric Tony Ukurikiyimfura
Kuya 31 January 2022 saa 11:58
Yasuwe :

Ikipe ya Musanze y’umukino wa Boccia ukinwa n’abantu bafite ubumuga yitwaye neza mu cyiciro cya mbere cya Shampiyona, itsinda imikino ibiri ku Cyumweru, tariki ya 30 Mutarama 2022.

Ku Cyumweru ni bwo hatangijwe Shampiyona ya 2022 mu mukino wa Boccia, icyiciro cyayo cya mbere gikinirwa mu Karere ka Rulindo.

Amakipe y’uturere twa Gakenke, Rulindo na Musanze ni yo yitabiriye iki cyiciro kibanza cya Shampiyona, imikino yitabiriwe n’Umuyobozi wungirije ushinzwe imibereho myiza y’abaturage mu Karere ka Rulindo, Mutaganda Théophile.

Mu mukino wa mbere, Musanze yatsinze Gakenke amanota 12-1 mbere y’uko itsinda Rulindo 11-6 mu gihe undi mukino wabaye ari uwo Rulindo yatsinzemo Gakenke amanota 13-1.

Gutsinda iyi mikino yombi byatumye Musanze iyobora igice kibanza cya Shampiyona n’amanota 23, ikurikiwe na Rulindo ifite amanota 19 mu gihe Gakenke ifite amanota abiri.

Umukino wa Boccia watangiye ukinwa n’abantu bafite ubumuga bwo mutwe ariko nyuma hongerwamo n’abandi bafite ubumuga bw’ingingo.

Mu 2016 ni bwo Komite y’Igihugu y’Imikino y’Abantu bafite Ubumuga (NPC Rwanda) yatangije Shampiyona y’uyu mukino mu Rwanda.

Shampiyona y’uyu mwaka izakinwa mu byiciro bitanu birimo icya kabiri kizabera mu Karere Ruhango tariki ya 26 Gashyantare 2022.

Ibindi byiciro bizabera muri Gasabo tariki ya 12 Werurwe, muri Ngororero ku wa 16 Mata ndetse na Nyarugenge ku wa 28 Gicurasi 2022.

Amakipe y'uturere dutatu ni yo yitabiriye Icyiciro cya mbere cya Shampiyona ya Boccia ku Cyumweru
Amanota abarwa harebwe ku mupira wegereye uw'umweru
Umuyobozi wungirije ushinzwe imibereho myiza y'abaturage mu Karere ka Rulindo, Mutaganda Théophile, yarebye iyi mikino yabereye mu Murenge wa Base
Uko amakipe yatsindanye mu mikino yabereye i Rulindo
Musanze iyoboye urutonde nyuma yo gutsinda imikino ibiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .