Police Handball Club yegukanye irushanwa rihuza amakipe y’inkorokoro mu Karere

Yanditswe na IGIHE
Kuya 8 Ukuboza 2019 saa 02:15
Yasuwe :
0 0

Police Handball Club yatwaye Irushanwa Mpuzamahanga ry’amakipe yabaye aya mbere mu bihugu byo muri Afurika y’Iburasirazuba no Hagati (ECAHF), nyuma yo gutsinda APR Handball Club.

Uyu mukino wakinwe ku wa 7 Ukuboza 2019 warangiye Police HC itsinze ibitego 30 kuri 27 bya APR HC. Amakipe yombi yari yasoje igice cya mbere Police HC iri imbere n’ibitego 22 kuri 15 bya APR HC.

Iri rushanwa ryaberaga kuri Stade Amahoro aho ryatangiriye tariki ya 2 Ukuboza 2019.

Police HC yatwaye igikombe yigaranzuye APR HC kuko mu gutangira irushanwa ku wa 3 Ukuboza 2019, APR HC yari yatsinze Police HC ibitego 38 kuri 37, ari na wo mukino wonyine iyi kipe y’abapolisi yatakaje.

Nyuma yo gutsindwa na APR HC, Police HC yatsinze andi makipe yose yitabiriye iri rushanwa mu bagabo, yakinnye n’ikipe yo muri Tanzania mu kirwa cya Nzanzibar yitwa Nyuki Handball Club iyitsinda ibitego 42 kuri 32, inatsinda ikipe ya Gicumbi HC ibitego 25 kuri 22.

Umukino wa nyuma w’iri rushanwa wari ukomeye cyane kuko wahuje amakipe ahora ahanganye mu Rwanda.

Igice cya mbere cyihariwe na Police HC kuko iminota 30 yarangiye Police irusha APR HC ibitego birindwi byose cyarangiye Police HC ifite ibitego 22 kuri 15 bya APR HC.

Bagiye mu kiruhuko cyamaze umwanya munini kubera imvura, mu gice cya kabiri APR HC yatangiye irusha Police HC ariko igorwa no gukuramo ikinyuranyo, umukino urangira Police HC irusha APR HC ibitego bitatu.

Umutoza wa Police HC, IP Antoine Ntabanganyimana, yashimiye abakinnyi be kubera ishyaka n’umurava byabaranze kuva batangira irushanwa.

Yagize ati “Ndashimira abakinnyi banjye ishyaka bagaragaje muri iri rushanwa kandi niko basanzwe. Biranshimishije kuba dushoboye kwigaranzura APR HC yari yadutsinze mu mukino ubanza w’iri rushanwa.”

Kapiteni wa Police HC, CPL Duteteriwacu Norbert, yemeza ko intsinzi bayikesha kuba barakosoye amakosa bakoze mu mukino ubanza wabahuje na na APR HC.

Yagize ati “Uyu munsi twari twaje twiyemeje gukosora amakosa twakoze mu mukino ubanza tugatsinda APR HC ndetse tugatwara igikombe cy’irushanwa.”

Iki ni igikombe cya gatandatu Police HC itwaye mu 2019 nyuma y’icyitiriwe Intwari z’Igihugu yatwaye muri Gashyantare; Shampiyona yatwaye muri Nyakanga; icy’Igihugu n’icy’amarushanwa ahuza Polisi zo mu karere k’Iburasirazuba (EAPCCO) yakuye muri Kenya muri Kanama n’icy’irushanwa rya Handball ikinirwa ku mucanga yegukanye mu Ukwakira.

Irushanwa rya ECAHF, Police HC yaritwaye ku nshuro ya kabiri nyuma y’aho yariherukaga mu 2015 ubwo ryari ryakiniwe mu Rwanda. Mu 2018, iri rushanwa ryatwawe n’Ikipe ya Polisi yo muri Repubulika Iharanira Demokarasi ya Congo.

Umukino wa nyuma wari uryoheye ijisho
Police HC yigaranzuye APR HC itwara igikombe cy'irushanwa rya ECAHF
Police Handball Club yatsinze APR HC ku mukino wa nyuma
Police Handball Club yegukanye irushanwa rihuza amakipe y’inkorokoro mu Karere ka Afurika y’Iburasirazuba no Hagati (ECAHF)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza