00:00:00 IGIHE NETWORK KN KINYARWANDA EN ENGLISH FR FRANCAIS

Police HC yatsinze Black Mamba yo muri Kenya mu mukino wa mbere wa ECAHF 2021, Kiziguro SS iranganya

Yanditswe na IGIHE
Kuya 1 December 2021 saa 04:32
Yasuwe :

Kuri uyu wa Gatatu, tariki ya 1 Ukuboza 2021, Police Handball Club yatangiye neza mu Irushanwa rihuza amakipe yo muri Afurika y’Iburasirazuba no Hagati muri Handball (ECAHF) riri kubera mu Mujyi wa Dar es Salaam muri Tanzania, itsinda Black Mamba yo muri Kenya ibitego 25-19.

Ni umukino utari woroshye ku mpande zombi kuko Black Mamba na yo ari ikipe ikomeye ndetse igice cya mbere cyarangiye Police HC iri imbere n’ibitego 15-10.

Mu gice cya kabiri, Police HC yinjijemo ibitego 10 naho Black Mamba ibonamo ibitego icyenda, byatumye umukino urangira harimo ikinyuranyo cy’ibitego bitandatu (25-19).

Umutoza wa Police HC, IP Ntabanganyimana Antoine, yari yabanje mu kibuga abakinnyi basanzwe bafite ubunararibonye mu marushanwa mpuzamahanga nka CPL Duteteriwacu Norbert (Kapiteni w’ikipe), Rwamanywa Viateur, Tuyishime Zacharie, Murwanashyaka Emmanuel, Bananimana Samuel (umunyezamu), Nshimiyimana Alexis na Niyigaba Théophile mu gihe abarimo Muhumure Elysée na Muhire Yves basimburaga.

Nyuma y’umukino, IP Ntabanganyimana yashimiye abakinnyi uburyo bitwaye imbere ya Black Mamba isanzwe iri mu makipe akomeye mu Karere ka Afurika y’Iburasirazuba, avuga ko bibaha amahirwe yo kugera ku mukino wa nyuma.

Ati ”Uyu wari umukino ukomeye cyane kandi twishimira nka Police HC kuba tuwutsinze, bitweretse ko dushobora kugera ku mukino wa nyuma w’iri rushanwa. Ku wa Kane, dufite undi mukino n’ikipe ya Nyuki HC yo muri Zanzibar, nidutsinda uyu mukino tuzaba tuyoboye itsinda bituganisha ku mukino wa nyuma.”

IP Ntabanganyimana yashimiye ubuyobozi bwa Polisi y’u Rwanda, abafana n’abakinnyi abereye umutoza kuko bakurikije amabwiriza yari yabahaye mbere y’umukino.

Ati ”Tukimara kumenya ko tuzabanza guhura n’Ikipe ya Black Mamba nicaje abakinnyi banjye tujya inama ku buryo tugomba kuyitsinda. Bubahirije amabwiriza nabahaye, abashinzwe kugarira bugariye neza n’abagomba gushaka ibitego nabo babishatse kandi biraboneka.”

Kapiteni wa Police HC , CPL Duteteriwacu Norbert, yongeye gushimangira ko we na bagenzi be bafite intego yo kwisubiza iki gikombe nk’uko babikoreye i Kigali mu 2019.

Yagize ati ”Ubundi twebwe umukino wose tuwufata nk’uwa nyuma, uyu na wo twawufataga nka Finale. Iyi kipe twayirushije ku buryo bugaragara kuko twabaga tuyiri imbere ibitego bitanu ikagerageza kubikuramo natwe tukayibera ibamba dukoresheje imbaraga z’umubiri ndetse n’ubwenge bwo mu mutwe.”

Irushanwa rya ECAHF ry’uyu mwaka wa 2021 ririmo kubera muri Tanzania, ryitabiriwe n’amakipe atandatu mu bagabo naho mu bagore hitabira amakipe atanu.

Mu bagabo, itsinda rya mbere rigizwe na Cereals (Kenya), JKT (Tanzania) na Ngome (Tanzania) mu gihe iyra kabiri rigizwe na Police HC (Rwanda), Black Mamba (Kenya) na Nyuki (Zanzibar).

Mu bagore, u Rwanda ruhagarariwe n’abakobwa bo mu Ishuri ryisumbuye rya Kiziguro. Iyi kipe ikaba yaganyije umukino wayo wa mbere yakinnye na JKT yo muri Tanzania ibitego 21-21 kuri uyu wa Gatatu.

Muri iki cyiciro, amakipe yose yitabiriye irushanwa azahura hagati yayo, nyuma izagira amanota menshi ikazegukana igikombe. Uretse Kiziguro SS, hari Cereals na Nairobi Water zo muri Kenya, Ngome na JKT zo muri Tanzania.

Police HC ni imwe mu makipe abiri ahagarariye u Rwanda mu irushanwa rya ECAHF 2021 riri kubera muri Tanzania
Mu mukino wayo wa mbere wabaye kuri uyu wa Gatatu, Police HC yatsinze Black Mamba yo muri Kenya ibitego 25-19
Abakinnyi ba Police HC bishimira gutangira neza muri iri rushanwa baheruka kwegukana ubwo ryaberaga i Kigali mu 2019
Kiziguro SS yanganyije na JKT mu mukino wayo wa mbere
Ikipe y'abakobwa ya Kiziguro SS ni yo ya mbere y'ishuri ryisumbuye iharagarariye igihugu muri iri rushanwa ryabereye hanze y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .