00:00:00 IGIHE NETWORK KN KINYARWANDA EN ENGLISH FR FRANCAIS

Police HC yisubije Igikombe cy’Irushanwa rihuza amakipe yo mu Karere k’Iburasirazuba no Hagati

Yanditswe na IGIHE
Kuya 4 December 2021 saa 07:43
Yasuwe :

Ku mukino wa nyuma w’Igikombe cy’amakipe yabaye aya mbere mu bihugu bya Afurika y’Iburasirazuba no Hagati (ECAHF) wabaye kuri uyu wa Gatandatu i Dar es Salaam, Police HC yari ihagarariye u Rwanda yatsinze Cereals yo muri Kenya ibitego 28-27, yisubiza irushanwa ku nshuro ya kabiri yikurikiranya.

Uyu mukino wa nyuma mu bagabo watangiye saa saba zo muri Tanzinia ari zo saa Sita za Kigali, wari ukomeye ku mpande zombi kuko zagendaga zisiganwaho igitego kimwe. Igice cya mbere cyarangiye Police HC iri imbere ya Cereals HC ku bitego 17-16.

Nk’ibasanzwe, abakinnyi ba Police HC mu gice cya kabiri bagarutse bafite imbaraga n’ishyaka bidasanzwe kuko batangiye gusigaho ibitego bigera kuri bitatu ku kipe bari bahanganye.

Nk’uko umutoza wa Police HC, IP Antoine Ntabanganyimana aherutse kubitangaza nyuma y’umukino wa 1/2 amaze gutsinda ikipe ya Ngome aho yavuze ko igice cya mbere agiharira kwiga ku mikinire y’ikipe bahanganye, ni ko yabigenje n’uyu munsi.

Gusa, Cereals yarimo abakinnyi bakomeye, yahaye akazi Police HC ariko umukino urangira Abanyarwanda begukanye intsinzi ku bitego 28-27.

Nyuma y’uyu mukino, IP Ntabanganyimana yashimiye abakinnyi, ubuyobozi bwa Polisi y’u Rwanda, abakunzi b’ikipe ndetse n’itangazamakuru ryo mu Rwanda batahwemye kuba hafi y’ikipe yabo.

Ati ”Iyi ntsinzi irenze kwitwa iya Police HC cyangwa iya Polisi y’u Rwanda, ni intsinzi ku Banyarwanda bose n’Igihugu muri rusange. Biradushimishije kuba tubashije kongera kwegukana iki gikombe nk’uko ubushize mu 2019 twari twabikoze turi i Kigali.”

Yavuze kandi ko ashimira Imana kuba imufashije gusohoza isezerano yari yahaye abakunzi ba Police HC ubwo yabizezaga ko azamanukana iki gikombe cya ECAHF i Kanombe.

Yongeyeho ati "Kuba Police HC ibasha gutsindira ibikombe mpuzamahanga ni ikimenyetso cy’urwego Handball igezeho mu Rwanda."

Kapiteni wa Police HC, CPL Duteteriwacu Norbert, yavuze ko ikinyabupfura no gukurikiza inama z’abatoza ari ryo banga rituma Police HC igera ku tsinzi.

Yongeyeho ko ikipe ikomeje kugaragaza ko idakomeye mu gihugu gusa ko ahubwo no mu ruhando rw’amahanga ishoboye.

Rwamanywa Viateur wa Police HC ni we wahawe igihembo cy’umukinnyi witwaye neza muri iri rushanwa.

Mu bagore, ikipe ya Kiziguro SS yari ihagarariye u Rwanda yasoje irushanwa iri ku mwanya wa gatatu nyuma yo kunganya na Cereals yo muri Kenya ibitego 24-24 mu mukino wa kane wabaye kuri uyu wa Gatatu.

Igikombe cyegukanywe na Nairobi Water yatsinze imikino yose uko ari ine. Ngome na KJT zo muri Tanzania ni zo zasoje ziri mu myanya ibiri ya nyuma mu makipe atanu yitabiriye mu bagore.

Biteganyijwe ko irushanwa ry’umwaka utaha rizabera mu kirwa cya Zanzibar muri Tanzania.

Police HC yatsinze Cereals yo muri Kenya ku mukino wa nyuma wabaye kuri uyu wa Gatandatu
Police HC yegukanye igikombe itsinze ibitego 28-27
Ikipe ya Polisi y'u Rwanda yisubije Irushanwa yaherukaga gutwarira i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .