00:00:00 IGIHE NETWORK KN KINYARWANDA EN ENGLISH FR FRANCAIS

Urukiko rwategetse ko Djokovic aguma muri Australia

Yanditswe na Eric Tony Ukurikiyimfura
Kuya 10 January 2022 saa 10:14
Yasuwe :

Nimero ya mbere ku Isi muri Tennis, Novak Djokovic, yemerewe kuguma i Melbourne no kwitabira Australian Open nyuma y’uko kuri uyu wa Mbere, urukiko rwategetse ko icyemezo cya Guverinoma ya Australia cyo kumwima visa giteshwa agaciro.

Djokovic yageze muri Australia ku wa Gatatu w’icyumweru gishize, ariko ashyirwa muri hoteli isanzwe icumbikirwamo abasaba ubuhungiro kuko yimwe visa kubera ko atikingije COVID-19.

Guverinoma ya Australia yavugaga hakwiye gusuzumwa icyatumye uyu mugabo ahabwa umwihariko ngo yitabire Australia Open tariki ya 17-30 Mutarama kandi atarikingije COVID-19.

Kuri uyu wa Mbere, Urukiko rw’i Melbourne rwanzuye ko Djokovic umaze kwegukana Grand slam 20, arekurwa mu gihe cy’isaha imwe ndetse agasubizwa pasiporo ye.

Umucamanza Anthony Kelly yavuze ko Djokovic yahawe icyemezo cya muganga kitamwemerera kwikingiza COVID-19 mbere y’uko ajya muri Australia kandi yacyerekanye ubwo yari ageze i Melbourne.

Ku wa Gatandatu, abanyamategeko b’uyu mukinnyi bari bagaragaje ko atikingije COVID-19 kubera ko yanduye iki cyorezo ku wa 16 Ukuboza 2021.

Nubwo Djokovic yatsinze muri uru rubanza, abashinjacyaha ba guverinoma ya Australia babwiye urukiko ko minisitiri ufite mu nshingano abinjira n’abasohoka afite ububasha bumwemera gutesha agaciro visa ye na none.

Djokovic yegukanye Australian Open inshuro icyenda zirimo eshatu ziheruka ndetse aramutse atwaye iy’uyu mwaka, yaca agahigo ko kuba ari we mukinnyi utwaye Grand slam nyinshi kurusha abandi, aho ubu anganya 20 na Roger Federer ndetse na Rafael Nadal.

Novak Djokovic yemerewe kuguma muri Australia nyuma y'uko bitegetswe n'urukiko kuri uyu wa Mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .