Ambasade y’u Budage mu Rwanda yahaye RAF ibikoresho byifashishwa mu mikino Ngororamubiri

Yanditswe na Eric Tony Ukurikiyimfura
Kuya 28 Ugushyingo 2020 saa 09:58
Yasuwe :
0 0

Mu rwego rwo gukomeza ubufatanye buri hagati y’impande zombi, Ambasaderi w’u Budage mu Rwanda, Dr Thomas Kurz, yashyikirije Ishyirahamwe ry’Imikino Ngororamubiri mu Rwanda (RAF) ibikoresho byifashishwa mu marushanwa atandukanye ritegura.

Iki gikorwa cyabaye ku wa Gatandatu ku biro by’Ishyirahamwe ry’Imikino Ngororangingo mu Rwanda (RAF) i Remera, ryari rihagarariwe n’Umuyobozi waryo, Mubiligi Fidèle.

Ibikoresho RAF yahawe na Ambasade y’u Budage birimo ibyo bahagurikiraho (starting-blocks), intosho (shotput), ingasire (discus), umubunda (javelin) n’inkoni bahererekanya (baton relays).

Ambasaderi w’u Budage mu Rwanda, Dr Thomas Kurz, yavuze ko batanze ibi bikoresho mu rwego gukomeza gushyigikira imikino ngororamubiri mu Rwanda ndetse bazakomeza gutanga ubufasha butandukanye burimo no guhugura abatoza.

Ati “Ni ubufatanye busanzweho nubwo hari ibitarakozwe kubera iki cyorezo cyibasiye Isi ku buryo twizera ko bizakomeza mu mwaka utaha. Ubutaha turashaka gukomeza ibyo twari twakoze mu Ugushyingo mu mwaka ushize duhugura abatoza. Hari abatoza bajya mu Budage guhugurwa kandi turizera ko bizakomeza.”

Perezida w’Ishyirahamwe ry’Imikino Ngororamubiri mu Rwanda (RAF), Me Mubiligi Fidèle, yavuze ko ari ibikoresho byari bikenewe kuko ubusanzwe nta byo bagiraga.

Ati “Ibi ni ibikoresho twari dukeneye kuko ibinshi ntabyo twari dufite kandi n’ibyo twari dufite ntibigezwego nk’ibi. Bizadufasha cyane gutegura abakinnyi bacu bakoresha ibikoresho bigezweho ku buryo kubikoresha bageze mu marushanwa mpuzamahanga bitazabagora.”

Ishyirahamwe ry’Imikino Ngorangingo mu Rwanda ryatangaje ko kandi kubona ibi bikoresho bizatuma hari amasiganwa atabaga agiye kongera gutegurwa nubwo bikiri bike.

Ambasaderi w’u Budage mu Rwanda, Dr Thomas Kurz, ashyikiriza ubuyobozi bwa RAF ibikoresho byifashishwa mu mikino ngororamubiri
Umuyobozi wa RAF, Mubiligi Fidèle, yakira intosho (shotput) nka kimwe mu bikoresho bahawe na Ambasade y'u Budage mu Rwanda
Hatanzwe kandi n'ibindi birimo inkoni zihererekanywa n'abakinnyi basiganwa ku maguru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .