00:00:00 IGIHE NETWORK KN KINYARWANDA EN ENGLISH FR FRANCAIS

APR na REG VC zemerewe gutangira imyitozo

Yanditswe na Eric Tony Ukurikiyimfura
Kuya 9 Werurwe 2021 saa 01:03
Yasuwe :
0 0

Minisiteri ya Siporo yemereye amakipe ya APR VC na REG VC gutangira imyitozo yo kwitegura irushanwa Nyafurika rihuza amakipe yabaye aya mbere iwayo, CAVB African Club Championship, rizaba hagati ya 2 n’iya 12 Mata 2021 mu Misiri.

APR VC yatwaye Shampiyona ya Volleyball mu mwaka ushize na REG VC yari yatwaye iyayibanjirije, zombi zizahagararira u Rwanda muri CAVB African Club Championship ya 2020/21.

Ibaruwa Umunyamabanga Uhoraho muri Minisiteri ya Siporo, Shema Maboko Didier, yandikiye Ishyirahamwe Nyarwanda ry’Umukino wa Volleyball (FRVB) ku wa Mbere tariki ya 8 Werurwe, yemerera amakipe yombi gutangira imyitozo.

Yagize ati “Nshingiye ku ibaruwa yanyu yo ku wa 03/03/2021 mwanditse musabira amakipe ya APR VC na REG VC ko basubukura imyitozo mu rwego rwo kwitegura amarushanwa Nyafurika y’amakipe yabaye aya mbere iwayo azabera mu Misiri;”

“Nejejwe no kubamenyesha ko Minisiteri ya Siporo ibemereye gusubukura imyitozo nk’uko mwabisabye, amakipe yose akabanza gupimisha abayagize no kubashyira mu mwiherero aho baba hamwe.”

Yakomeje agira ati “Mboneyeho gusaba FRVB gukurikirana iyubahirizwa ry’ingamba zashyizweho na Leta zo gukumira icyorezo cya COVID-19 ndetse n’izo mwatugejejeho.”

Kimwe n’iyindi mikino ihuza abantu benshi, Volleyball ntiri mu cyiciro cy’imikino iheruka gukomorerwa na Minisiteri ya Siporo ngo isubukure imyitozo.

Gusa, inama yahuje Minisiteri ya Siporo n’amashyirahamwe y’imikino itandukanye mu kwezi gushize, itanga icyizere ko ibikorwa by’imikino bizasubukurwa muri uku kwezi.

Ingamba rusange zerekeye kwirinda COVID-19 ziheruka gufatwa n’Inama y’Abaminisitiri zizageza ku wa 15 Werurwe 2021.

APR VC yaherukaga gukina Champions League mu 2015, aho yasoreje ku mwanya wa gatandatu muri iryo rushanwa ryari ryabereye i Sousse muri Tunisia.

Kuri REG VC, ni bwo bwa mbere izaba yitabiriye iri rushanwa.

Mu bagore, u Rwanda ruzahagararirwa na UTB na APR WVC, ariko Impuzamashyirahamwe y’Umukino wa Volleyball muri Afurika, CAVB, ntiratangaza amatariki n’ahazabera iryo rushanwa.

REG VC na APR VC zizahagararira u Rwanda muri Shampiyona Nyafurika ihuza amakipe yabaye aya mbere iwayo izabera mu Misiri mu kwezi gutaha
APR VC yatwaye Shampiyona ya Volleyball ya 2019/20
REG VC yatwaye Shampiyona ya 2018/19, ariko mu mwaka ushize ntihaba irushanwa Nyafurika kubera COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .