Sitting Volleyball: U Rwanda rwageze ku mukino wa nyuma wa Shampiyona Nyafurika y’abagabo

Yanditswe na Eric Tony Ukurikiyimfura
Kuya 22 Nzeri 2019 saa 03:48
Yasuwe :
0 0

Ikipe y’Igihugu y’Abagabo y’Umukino wa Sitting Volleyball irakina n’iya Misiri ku mukino wa nyuma wa Shampiyona Nyafurika y’Abafite Ubumuga iri kubera i Kigali muri Petit Stade i Remera, ni nyuma y’uko itsinze iya Algérie amaseti 3-1 mu mukino wa ½ wabaye kuri uyu wa Gatandatu.

Iri rushanwa ryatangiye ku wa Kane, aho rihuje ibihugu bitandatu, rirasozwa kuri iki Cyumweru hakinirwa umwanya wa gatanu, uwa gatatu n’umukino wa nyuma.

U Rwanda rwizeye kugera ku mukino wa nyuma ubwo rwatsindaga Algérie amaseti 3-1 (19-25, 25-19, 25-19, 25-15) mu mukino wabaye kuri uyu wa Gatandatu.

Misiri na yo yongeye kugera ku mukino wa nyuma itsinze Kenya amaseti 3-0 (25-9, 25-6, 25-10) mu mukino wa ½ wabanjirije uw’u Rwanda.

Kapiteni w’u Rwanda, Vuningabo Emile Cadet, yavuze ko imikino yose bari bamaze gukina muri iri rushanwa bayikinnye bazirikana uwa nyuma uzabahuza na Misiri yaherukaga kubatwara igikombe mu 2017.

Ati ”Ni umukino ukomeye cyane, kuba Algérie yatubonyemo iseti ni uko twari turimo gutekereza umukino wa nyuma kuko muri iri rushanwa tuba duhanganye na Misiri, niyo twitegura ni na wo mukino ukomeye dufite. Turasaba Abanyarwanda baze kudushyigikira tubona itike yo kujya i Tokyo.”

Kuri iki Cyumweru hateganyijwe imikino itatu, aho guhera saa 10:00, Maroc yahuye na Afurika y’Epfo zihataniye umwanya wa gatanu mu gihe guhera saa 15:00 Kenya na Algérie zihatanira umwanya wa gatatu.

Umukino wa nyuma uratangira saa 18:00 n’ubundi muri Petit Stade i Remera, hagati y’Ikipe y’u Rwanda n’iya Misiri zaherukaga guhura mu 2017, Misiri itwara igikombe itsinze amaseti 3-0.

Nk’uko byagenze mu bagore, ikipe ya mbere irahabwa igikombe n’itike yo kuzahagararira Afurika mu mikino Paralympique izabera i Tokyo mu Buyapani mu mpeshyi yo mu 2020. Izaba kuva tariki 25 Kanama kugeza ku wa 6 Nzeri 2020.

Ikipe y'u Rwanda y'Abagabo yageze ku mukino wa nyuma muri Shampiyona Nyafurika y'Abafite Ubumuga iri kubera i Kigali
U Rwanda rwahuye na Algerie mu mukino wa 1/2 wabaye kuri uyu wa Gatandatu
Umutoza w'u Rwanda, Umunya-Misiri Mossad Rashad Elaiuty
Umutoza wa Algerie yari yumiwe
U Rwanda rurahura na Misiri kuri iki Cyumweru mu mukino utangira saa 18:00 muri Petit Stade i Remera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza