Sitting Volleyball: U Rwanda rwasubiriye Misiri rwegukana Igikombe cya Shampiyona Nyafurika

Yanditswe na Eric Tony Ukurikiyimfura
Kuya 17 Nzeri 2019 saa 10:00
Yasuwe :
0 0

Ikipe y’u Rwanda y’abagore yegukanye igikombe cya Shampiyona Nyafurika y’Abafite Ubumuga ya Sitting Volleyball yari imaze iminsi itatu ibera i Kigali muri Petit Stade i Remera.

U Rwanda rwatsinze Misiri amaseti 3-1 (22-25, 28-26, 25-15 na 25-18) ku mukino wa nyuma wakinwe kuri uyu wa Kabiri. Muri iyi Shampiyona nyafurika hitabiriye amakipe atatu mu bagore ari yo u Rwanda, Kenya na Misiri.

U Rwanda ni rwo rwari rufite igikombe cy’iyi Shampiyona ubwo yakinwaga mu 2017, rugatsinda Misiri amaseti 3-0.

Nyuma y’uko amakipe atatu yitabiriye iri rushanwa ry’abagore ahuye hagati yayo, u Rwanda rugatsinda imikino yose irimo ibiri rwahuyemo na Misiri, aya makipe yombi yongeye kwisobanura ku mukino wa nyuma.

Misiri ntiyoroheye u Rwanda kuko yatsinze iseti ya mbere ku manota 25-22 mu gihe u Rwanda rwayishuye mu buryo bugoranye ku manota 28-26.

Ikipe y’u Rwanda itozwa n’umunya-Misiri, Mossad Rashad Elaiuty yahinduye umukino ku buryo bugaragara mu iseti ya gatatu n’iya kane, izitsinda ku manota 15 na 18 ya Misiri.

Gutsinda uyu mukino byahesheje u Rwanda kwisubiza igikombe cy’iyi Shampiyona Nyafurika n’itike yo kuzahagararira uyu mugabane mu mikino Paralympique izabera i Tokyo mu Buyapani mu mpeshyi yo mu 2020. Izaba kuva tariki 25 Kanama kugeza ku itariki 6 Nzeri 2020.

Nyirambarushimana Sandrine ni we wabaye umukinnyi w’irushanwa mu gihe Khalil Esraa (Misiri), Bazubagira Claudine, Mukobwankawe Liliane, Umutoni Clementine na Nyirambarushimana Sandrine bahembwe nk’abakinnyi bagize ikipe y’irushanwa.

Guhera kuri uyu wa Gatatu tariki ya 18 Nzeri, haratangira irushanwa ry’abagabo rizasozwa ku Cyumweru tariki ya 22 Nzeri 2019.

Amakipe y’abagabo azitabira iri rushanwa ni u Rwanda, Algérie, Misiri, Kenya, Maroc na Afurika y’Epfo, aho ikipe ya mbere izabona itike yo kwerekeza i Tokyo mu mwaka utaha.

Ubwo iri rushanwa ry’abagabo ryabaga mu 2017, Misiri yatsinze u Rwanda ku mukino wa nyuma amaseti 3-0.

U Rwanda rwegukanye Shampiyona Nyafurika y'abafite ubumuga ya Siiting Volleyball n'itike yo gukina imikino Paralempike izabera i Tokyo mu mwaka utaha
Nyirambarushimana Sandrine yatowe nk'umukinnyi w'irushanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza