U Rwanda rwegukanye umudali wa Zahabu muri Para Beach Volley yabereye i Kigali

Yanditswe na Eric Tony Ukurikiyimfura
Kuya 18 Nzeri 2019 saa 08:00
Yasuwe :
0 0

Ikipe y’u Rwanda y’umukino wa Volleyball yo ku mucanga y’abafite ubumuga (Para Beach Volley) yegukanye umudali wa Zahabu mu irushanwa ryabereye i Remera kuri uyu wa Gatatu, itsinze iya Algérie amaseti 2-0 (21-16 na 21-17).

Iri rushanwa ryakinwe mu gihe ejo ku wa Kane hazatangira Shampiyona Nyafurika y’abagabo mu mukino wa Sitting Volleyball, izabera muri Petit Stade i Remera kugeza ku Cyumweru tariki ya 22 Nzeri.

Para Beach Volley ikinwa n’abakinnyi batatu kuri buri kipe, bahagaze, ntabwo yari imenyerewe ndetse kuri iyi nshuro yakinwe mu rwego rwo kumenyekanisha umukino wa Beach Volley ikinwa n’abafite ubumuga, aho ku mugabane wa Afurika, yitabiriwe n’u Rwanda, Algérie, Afurika y’Epfo na Maroc.

Ibi bihugu bine byagabanyijwe mu matsinda abiri, irya mbere rigizwe n’u Rwanda na Maroc mu gihe irindi ryari rigizwe na Algérie na Afurika y’Epfo.

Ikipe y’u Rwanda yari igizwe na Ngizwenimana Jean Bosco, Bizimana Dominique na Nkaka Serge, yatsinze iya Maroc amaseti 2-0 (21-9, 21-9) ibona itike yo gukina umukino wa nyuma na Algérie yatsinze Afurika y’Epfo, na yo amaseti 2-0.

U Rwanda rwegukanye umudali wa Zahabu rutsinze Algérie amaseti 2-0 (21-16 na 21-17) mu gihe Afurika y’Epfo yegukanye umudali w’Umuringa kuko Maroc bari guhatanira umwanya wa gatatu yatewe mpaga nyuma y’uko umukinnyi umwe wayo agize imvune.

Bizimana Dominique asanzwe ashinzwe iterambere rya Para Beach volleyball muri Para Volley Africa. Yavuze ko bashimishijwe no kwegukana iri rushanwa rishya.

Ati” Nk’Umunyarwanda turishimye kubona umukino nk’uyu uri muri gahunda z’imikino Paralympique ya 2028, ni ukwiha igihe ngo abantu batangire bawumenyere. Turishimye ko ribereye mu Rwanda ndetse kuba turitwaye biraza gufasha u Rwanda kujya mu bihugu bya mbere.”

Ngizwenimana Jean Bosco na Bizimana Dominique bombi bari mu ikipe y’u Rwanda y’abagabo izakina Shampiyona Nyafurika ya Sitting Volleyball izatangira kuri uyu wa Kane.

Amakipe y’abagabo azitabira iri rushanwa ni u Rwanda, Algérie, Misiri, Kenya, Maroc na Afurika y’Epfo, aho ikipe ya mbere izabona itike y’imikino Paralympique izabera i Tokyo mu Buyapani mu mpeshyi yo mu 2020. Izaba kuva tariki 25 Kanama kugeza ku itariki 6 Nzeri 2020.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza