Abanyarwanda bahiriwe mu gace ka kabiri ka East Africa’s Got Talent

Yanditswe na Uwiduhaye Theos
Kuya 12 Kanama 2019 saa 07:56
Yasuwe :
0 0

Ku mugoroba wo kuri iki Cyumweru tariki 11 Kanama 2019 nibwo herekanywe agace ka kabiri k’irushanwa rya “East Africa’s Got Talent” rihuje abanyempano bo mu bihugu bine bigize Akarere ka Afurika y’Iburasirazuba.

Ni amarushanwa yaciye kuri Televiziyo y’u Rwanda, Citizen TV yo muri Kenya, Clouds TV yo muri Tanzaniya na NBS yo muri Uganda.

Abarushanwa berekanaga impano zabo mu ngeri zitandukanye harimo kuririmba, gucuranga, kubyina no kwiyerekana mu mikino ngororamubiri.

Icyumba cyari cyuzuyemo abantu benshi bahawe amahirwe yo kwirebera irushanwa amaso ku maso n’Akanama Nkempurampaka kagizwe n’Umunyarwandakazi Makeda Mahadoe, Umunya-Tanzaniya Vanessa Mdee, Umunyakenya Jeff Koinange na Gaetano Kagwa wo muri Uganda.

Mu biyerekanye harimo abanyarwanda babiri bose bahiriwe n’iri rushanwa bakaba bazakomeza mu kindi cyiciro.

Barimo itsinda rya Young Circus rikora umukino wo kugenda utera udupira hejuru mu buryo bw’amayobera bizwi nka ‘Juggling’ ryabanje ku rubyiniro rikitwara neza rikabasha gutambuka.

Umusore witwa Taikun nawe ukomoka mu Rwanda yishimiwe cyane mu njyana ya Hip Hop, n’ubwo yaririmbaga mu Kinyarwanda abantu benshi banyuzwe n’ubuhanga bwe ndetse n’abagize akanama nkemurampaka bamubwira ko nakomeza azagera kure.

Ajya gusoza abantu yababwiye kujya basubiramo izina rye, ashyushya benshi. Uyu musore yabonye ‘Yego’ eshatu ariko umunya-Kenya Jeff Koinange yari yamuhaye ‘Oya’ nubwo bitamubujije gukomeza mu kindi cyiciro.

Umwana witwa Elvis uvuza ingoma za kizungu mu buhanga buhambaye yashimishije benshi. Esther w’imyaka 14 na Ezekiel wa 16 bo muri Uganda nabo banejeje benshi kubera amajwi atagira uko asa bafite iyo baririmba.

Biteganyijwe ko iri rushanwa rizajya ryerekanwa buri Cyumweru, rikazasozwa mu Ukwakira aho uzaritsinda azegukana ibihumbi $50 asaga miliyoni 50 z’amafaranga y’u Rwanda.

Ni ku nshuro ya mbere irushanwa nk’iri ribaye ariko hasanzwe hamenyerewe ayo mu bwoko bumwe nka Britain’s Got Talent, America’s Got Talent n’andi.

Mu gace kabanje nabwo abanyarwanda barahiriwe cyane ko Fidele Fle w’imyaka 37 y’amavuko uririmba akaba n’umucuranzi wa gitari yabashije gukomeza.

Yaririmbye indirimbo yitwa Ne Me Quitte Pas ya Jacque Brel. Ubwo yaririmbaga iyi ndirimbo abantu bose bari batuje bamuhanze amaso, ariko amarangamutima ari menshi ku maso abona “Yego” enye.

Itorero ryitwa ‘Uruyange’ ribyina gakondo rigizwe n’abana b’abakobwa batanu n’umubyeyi umwe ubaterera akanabavugiriza ingoma naryo ryakomeje mu kindi cyiciro.

Reba agace ka kabiri ka East African Got Talent

Uyu musore witwa Taikun yashimishije benshi muri Hip Hop abasha gukomeza
Abagize akanama nkempurampaka ka East Africa's Got Talent bashimye impano z'abanyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza