Unyujije amaso ku rukuta rwa Instagram rw’uyu Munyarwanda, umubonana n’abagabo bafite amazina yubashywe ku Isi y’imyidagaduro, barimo abakinnyi mu mikino itandukanye ndetse n’abahanzi bakomeye.

Muri aba harimo nk’umuteramakofi w’Umwongereza uri mu beza ku Isi, Anthony Joshua, umuhanzi mpuzamahanga ufite inkomoko muri Senegal, Akon, Patrice Evra wamenyekanye cyane muri Manchester United n’Ikipe y’Igihugu y’Ubufaransa ndetse n’abandi benshi.

Muri iyi nkuru turagerageza kugaruka ku byamamare 10 byogoshwe n’uyu mugabo.

Mu kiganiro kigufi yagiranye na IGIHE, Nzabonimpa yavuze ko ibi byamamare ahura nabyo bije kwiyogoshesha aho akorera mu Mujyi wa Dubai.

Ati “Kenshi bakunze kuza inaha mu biruhuko, mu gihe bakeneye kwiyogoshesha bagahita baza muri salon yacu kuko iri mu zikomeye, ni uko nisanga baje nkabogosha kandi nureba neza bamwe bamaze no kuba abakiliya banjye.”

Nzabonimpa yahishuye ko yatangiye umwuga wo kogosha mu 2002, awuhera ahazwi nko kwa Rubangura muri salon yitwa ‘La Referance’.

Mu 2013 nibwo yageze mu Mujyi wa Dubai agiye gushakisha, ubu akaba ari umwogoshi ukorera muri MK Barber Shop ikundwa n’ibyamamare ku Isi.

Umwaka ushize wa 2021, Nzabonimpa yahembwe nk’umukozi w’umwaka muri iyi salon iri mu zikomeye i Dubai.

Nyuma yo kogosha Akon, Nzabonimpa yafashe agafoto n'uyu muhanzi w'icyamamare ku Isi

Anthony Joshua amaze kuba umukiriya wa Nzabonimpa, inshuro nyinshi akeneye kwiyogoshesha ari mu biruhuko i Dubai ahita ajya kumureba

Umukinnyi wa ruhago wamenyekanye muri Arsenal na Manchester City Bacary Sagna nawe yamaze kuba umukiriya wa Nzabonimpa

Umunya Austria ukinira ikipe ya Real Madrid David Alaba, yafatanye ifoto na Nzabonimpa wari umaze kumwogoshera i Dubai

Nimero gatatu wa Manchester United n'Ikipe y'Igihugu y'Ubufaransa, Patrice Evra ubwo yari ari kogoshwa na Nzabonimpa bafatanye agafoto k'urwibutso

Nzabonimpa ari kogosha Gary Dourdan umukinnyi wa filime w'icyamamare muri Amerika

Nzabonimpa nyuma yo kogosha Adnan Januzaj, umukinnyi wa ruhago w'Umubiligi wamenyekanye muri Manchester United

Nzabonimpa nyuma yo kogosha Jordan Rukaku akaba murumuna wa Romelu Lukaku

Clarence Clyde Seedorf ubwo yari amaze kogoshwa na Nzabonimpa

Nzabonimpa ari kogosha Weston James Earl McKennie Umunyamerika ukinira Juventus

Nzabonimpa yahawe igihembo cy'umukozi w'umwaka muri salon y'iwabo